InfoHub Logo

Oljastyń qalaǵa saparlap ketkenin paıdalanǵan Jandos, aǵasynyń úsh kishkentaı qobdısha asyǵy men eki qulja saqasyn utqyzyp, oıynnan sharshap kelip otyrǵan. Qalaı boldy ózi? Túsinbeı dal... Asyqty táp-táýir oınaıtyn. Álde, ruqsatsyz alǵan soń solaı boldy ma? «Ruqsatsyz alý?..» Ol urlyq qoı? «Joq, urlyq emes, — dedi qalqan qulaq qara bala. — Oljas maǵan bóten emes... Týǵan aǵam... Ári, ol asyqtardy oınaý úshin jınadyq qoı!..»

Jandos oılandy. Qandaı amal bar? Áýelgi nıeti Oljasty qýantyp, kóp-kóp asyq utpaqshy edi, ol jospary iske aspady. Kesheli beri eki júzdeı asyqtan aırylyp otyr. Eki júz asyq... Az emes...

Jandosqa bul isi unamady. Ózine-ózi renjip, unjyrǵasy tústi. Qalaısha utyldy? Álde, asyq oınaǵan balalar, ózinen úlken bolǵan soń jeńildi me? Jylaǵysy keldi. Kóńilsiz, meń-zeń otyryp qalǵanymen, jylaı almady. Kózdiń jasy da ońaıshylyqpen shyqpaıdy eken-aý... «Qalaı bolǵanda da meniki durys emes, — dep ýaıymdap júrdi ol keshke sheıin. — Qatelik jiberdim...»

Jandos erteńinde dostarymen jıdek terýge aýyldan uzap, Taldybulaq saıyna ketti de, asyq jaıly umytyp úlgerdi...

Bir aptadan soń oralǵan Oljas, aýladaǵy balalardyń qolynan óziniń eki saqasyn kórip, jaǵdaıdy bilip, úıge kele sala Jandosty izdedi. İnisi atasynyń qasynda áńgime tyńdap otyr. Mop-momyn, tártipti bola qalypty. «Bárin búldirip, túk bilmegendeı, tympıyp otyrýyn qarashy...»

— Sen meniń saqalarym men asyqtarymdy utqyzyp jiberipsiń ǵoı,— Jandos áı-shaıǵa qaramastan, Jandosty qulaq shekeden qonjıtty.

Ańdaýsyzda taıaq jegen qara bala, alashanyń ústine qulaı ketip, aıqaıǵa basyp jylady. Kereýet ústinde kózi jumýly domalanyp uıqyda jatqan aq mysyq, Jandostyń daýysyn estip, eleń etip basyn kóterip aldy. Óksip jylap jatqan Jandostyń qasyna jetip, Oljasqa bir, balalardyń atasyna bir, kezek-kezek qaraı berdi. Kózinen balany aıaǵany kórinip tur. Nege urdy deıtindeı...

— Balam Oljas! Bunyń ne? Sende ana aq mysyqtaı da aqyl joq eken! Qarashy, mysyq ekesh mysyq ta, Jandosqa jany ashyp, arasha túsip jatyr. Asyqqa bola, ózińnen jeti jas kishi inińe qol kóterýiń durys pa? — dedi atasy keıip.

Oljas atasynan mundaı ýájdi kútpese kerek. Aq mysyqtyń janashyrlyǵyna qaıran qaldy. Óziniń ashý ústinde ábestik jasaǵanyn bildi.

---