InfoHub Logo

Aıbektiń kókesi jaqsy jańalyq ákeldi. Jańa páter alatyn bopty. «Alataý» shaǵyn aýdanynan. Úshinshi podezd. Toǵyzynshy qabat.

Sonymen Aıbekter jańa páterge qonys aýdardy. Joǵarǵy qabat qorqynyshty sıaqty. Sheshesi «jazataıym qulap ketip júrersiń» dep balkonǵa bir ózin shyǵara bermeıdi. Al Aıbekke salsa bıikti mekendeý qyzyq sıaqty. Bárinen buryn arly-berli qaıshylasyp, kóshede aǵylyp jatqan máshıneler, jaıaý júrgen kisiler alaqandaǵydaı kórinedi.

Turǵyndar kóship kirgen soń lıft qosty. Oǵan eń aldymen atasy qýandy. Sebebi, jıyrma kúndeı tysqa shyǵa almaı ylajsyz qamalǵan bolatyn. Taza aýany balkonnan, jelkózden jutqan. Endi raqat. Tomashadaı uıa-lıftige enedi de, ip-ilezde tómenge túsedi. Dalaǵa shyǵady. Taıaǵyna súıenip, aýlada ári-beri asyqpaı júredi.

Qıýy qashatyn is aıaq astynan eken. Bir podez- de turatyn bes-alty bala, tústen keıin sabaqtan qaıtqanda lıftiniń qyzyǵyn ábden kórdi. Kózdi ashyp-jumǵansha joǵary kóteriledi. Sosyn tómen quldılaıdy. Úlkenderdiń kóbi jumysta. Áı der aja, qoı der qoja joq. Lıftegi kezekshilik jasaıtyn orys áıeli de kórinbeıdi.

Balalar jarty saǵattaı qyzyqqa batty. Tegin oıyn tapqandaryna máz. Bir kezde júrip kele jatqan lıft syr etti de, besinshi qabatta toqtap esik ashyldy. Balalardyń eresegi Myrzash jalma-jan túımeni basty. Lıft qozǵalmaıdy. Kózderi alaqtap turdy-turdy da, tym-tyraqaı bezip jóneldi.

Keshqurym dalaǵa bettegen Aıbektiń atasy jyldam qaıtty. Qabaǵy qatýly. Óńi synyq. Quddy ókpelegen baladaı. Jaq ashpaıdy. Sóıtse, lıft toqtapty. İsten shyqqan. Jaıaý túseıin dese qıyn. Túsýin túsedi-aý. Qaıyra joǵary kóterilý qıamet.

Lıft úsh kún júrmedi. Atasy daǵdy boıynsha dálizge shyǵada da, ile oralady.

Aıbek ókindi. Aǵattyq jasaǵanyn ańdady. Olaı etpeıdi, endigári. Dostaryna túsindirip aıtýy kerek.

Júgirip úıden shyqqan. Shahtadaǵy qyzyl túıme janyp tur. Basyp edi, zyr etken dybys estilip, lıft kóterilip kele jatty.

---