InfoHub Logo

Keshqurym Aldannyń jóteli jıilep, ystyǵy kóterildi. Mazasy ketti.

— Salqyn tıgen ǵoı. Kún uzaq ózennen shyqpaıdy... Ystyq sútke sary maı qosyp berińder, terlesin. Erteń-aq saýyǵady, — dedi kókesi.

— Keýdesinde syryl bar sıaqty. Qysha jaǵylǵan qaǵaz qoıý kerek, — dedi mamasy.

— Qoıdyń maıyn eritip ishkizińder, ol da em, — dedi ájesi.

Aıtylǵan em-domnyń barlyǵy jasaldy. Biraq balanyń ystyǵy qaıtar emes. Dóńbekship, uıqysy qashty. Jóteli odan saıyn jıiledi. Tipti bolmaǵan soń jedel járdem shaqyrtqan. Dáriger ystyǵyn ólshep, keýdesin tyńdady da, «sýyq tıgen» dep aýrýhanaǵa alyp ketti.

Mine, jeti kún. Qazir táýir. Jóteli basylǵan. Bastapqy eki-úsh kún tósekte qozǵalmastan jatty da, ystyǵy qaıtqan soń turǵan. Ózi quralpy uldar da bar. Nurtaı degen súıkimdi aq sary balamen kereýeti qatar. Ári ekeýi de bir jylǵy tól. Ol da úshinshi synypqa kóshipti. Nurtaı kitapty kóp oqıdy. Zerek. Pysyq. Bilmeıtin ertegisi joq. Talaıyn aıtyp berdi.

«Qym-qıǵash oqıǵaly, uzaq ertegilerdi qalaı jadyna saqtaıdy» dep tańǵalady balalar.

Aldannyń mamasy men ájesi kún qurǵatpaı keledi. Túneýgúni birge oqıtyn synyptas Serik pen Nazgúldi kórgende keremet qýandy. Ózderi pále. Eki saýyt «Jýsı» shyryny men bir páshki pecheneleri bar. Synyptaǵy, mekteptegi jańalyqty aıtyp, qam kóńilin kóterip tastady.

Aldannyń esine Sárýar tústi. Kishkentaı kúnderinen ekeýi birge ósti. Aýyl shetindegi jańa úılerine qonys aýdarǵansha, byltyrǵa deıin bularmen kórshi turdy. Eki úı arasy qashyqtaý bolsa da, mektepke birge barady. Birge oınaıdy. Ylǵı birge...

Sol dosy Aldanǵa áli kelgen joq. Álde, renjitken kezi boldy ma? Oılap otyrsa, ondaı sebeptiń jóni kelmeıdi. «Joldastyǵyń ánsheıinde eken... Syryń belgili...» dep ókpeledi Sárýarǵa.

Kóp uzamaı Aldan aýrýhanadan shyqty. Kórshi balalarmen kezdesip áńgimelesti. Sárýardy surady. Sóıtse, ol attan qulap, mertigip aýrýhanaǵa túsipti. — «Báse, — dep oılady ol. — Dos ekeni shyn bolsa, bir ret keler edi...»

— Mama, dámdi etip tamaq jasańyzshy! Men baqshadan kókónis ákeleıin! — dedi Aldan úıge kirgen zamatta. Ózi asyǵys. Qımyly shalt.

— Kúnim-aý, bálnistiń sýly-sylpyń botqasynan qarnyń ábden ashqan-aý, tegi! — deıdi aınalyp-tolǵanǵan ájesi.

— Áje, álginde estidim... Sárýar oqystan aıaǵyn syndyryp, aýrýhanada jatqan kórinedi. Búgin siz ekeýmiz baryp qaıtsaq qaıtedi. Kózi jáýdirep kóshege qarap, tosyp jatqan shyǵar dostaryn...

— Aqylyńnan aınaldym! Barsaq, baraıyq... Adamnyń dostyǵy, baýyrmaldyǵy osyndaıda... synǵa túsedi... Mamań qazir-aq kirisedi tamaq isteýge.

Aldannyń Sárýarǵa degen ókpesi tarqap júre berdi. Dosyn tezirek kórgisi kelip asyǵa tústi.

---