InfoHub Logo

(Ańyz)

Shól dalada shólirkep ómir keshken,

Arabtardy jáhılıa aıyrdy esten.

Adam degen ataýy qalsa daǵy,

Qarańǵylyq túnekte ónip-ósken.

Ada bolǵan ımannan, rýhtan da,

Adasqandar aq joldan  muny uqqan ba?

Kúpirlik pen azǵyndyq qunyqqanǵa.

Adam adam  bolýdan qalǵan zaman,

Shiriktiń, nadandyqtyń aýlynan.

Malsha  órgen oıana sap turyp tańda,

At basyn burǵyzatyn kúpirlikten

Túbine jetetuǵyn sáýleli adam.

Týsa dep tilese de tilin tistep,

Zorlyq penen qorlyqqa ózin kúshtep.

Kóndirgen qul da bolǵan, kúń de bolǵan,

Kúrsinip kúńirengen tynyp ishten.

Sol tusta senim-nanym degenderiń,

Sekildi edi kóp qudaıǵa kógendeýli.

Tas, taqtaı, halýadan put jasap jurt,

Solardan tilek tilep, eleńdedi.

Eshteńege senbeıtin birazdary,

Aıatta bular jaıly bylaı degen.

-Senderge ómir bergen Qudaı degen.

Óltiretin, qıamette tiriltetin Qudaı degen.

Senińder oǵan budan bylaı degen.

Keı Arab Allaǵa da senetin-di,

Jaratqanǵa kóńilin bóletin-di.

«Paıǵambar adamdardan shyǵad» deseń,

Qolyńda keı qyzbalar óletin-di.

Onyń da sebebi joq demes edik,

Jóni bar kúıip-janyp egeserlik.

Bir áıeldiń kúıeýi birneshe erkek,

Ógeı sheshe ulynyń ámeńgeri.

Qoǵamdy mundaı jaılar jaılap derlik,

Jaılaǵan kezeń edi túgel derlik,

Kúsh joq ed qarsy turyp júgenderlik.

Bolashaq Islamnyń altyn tóri,  

Bir sózben, lastanǵan Arab jeri.

Bolashaq Islamnyń altyn tóri,

Súıikti paıǵambardyń týǵan jeri.

Aǵylǵan qaǵbaǵa jurtty kórip,

Ábraha úı aldynda tur túnerip.

-Malǵundar! –dep zıratshylarǵa tistenedi.

-Ketpesem dál osy sát búgin ólip,

Kórsetem senderdi áli!

Qaǵbaǵa barǵan-dy attaı jelip,

Osylaı óz-ózinen kúpindi kep.

Búıirinen Jann* túrtip, armany údep,

Sanadan Kýlleıs atty shirkeý salyp.

Habashtyń bıleýshisin etpek tirek,

Hat jazdy: «Mártebelim, bıleýshi!»- dep.

-Qurmetińe bir shirkeý turǵyzdym,- dep

Arab, Ajar buryn-sońdy kórgen emes,

Olarǵa kókten túsken bul bir eles.

Sanadaǵy Kýlleıs shirkeýiniń

Synshyl kóz tappas edi tipten miniń.

Sáýlettiń sáni kelgen eskertkishi,

Zamanda paıda bolar bir yqylym.

Kórgen jannyń ózine kózin tartqan,

Altyn, kúmis, asyltas jarqyratqan.

Shirkeýge attyń basyn burǵandar kóp,

Aǵylǵan alys-jaqyn shartaraptan.

Tek qana basyn suǵyp ile shyǵyp,

Jańbyrdan mezi bolǵan qoıdaı yǵyp.

Qaǵbaǵa ile shala bet alatyn,

Shirkeýden jarqyraǵan túsi sýyq.

Arabtar bul shirkeýge kirip shyqqan,

Ábrahanyń aram oıyn birden uqqan.

-Qaǵbannyń bedelin túsirmek qoı,

Túk shyqpaıd,-

dep gúlesti,- dushpandyqtan.

Osylaı degenderdiń biri- Náýfpál,

Meıliń sók áreketin, meıliń tań qal.

Shirkeýdiń ishine de, tysyna da,

Dáretin syndyrypty sol aqsaqal.

Shirkeýdi osylaısha mazaq etken,

Ábraha estigende kúıip ketken.

-Arabtarǵa qarsylasqanym, qarsylasqan,

Qaǵbany kúl qylamyn, –dedi óktem.

Bardy joq,

 Joqty máńgi bar qylamyn,

Qaǵbany jer betinen máńgi joıam.

Tappaısyńdar kelse de barǵylaryń,

Seń soqqandaı senderdi sendeltemin.

Demeımin qan tógemin, eldi órteımin,

Jazyqsyzǵa áste qol kótermeımin.

Oılanar esti jandar el erteńin,

Tek qana Qaǵbany talqandaımyn.

Shágim bar qudyretine bir qudaıdyń,

Onan men qudyrettimin, meıirimdimin,

Tyń qýat ón boıymnan tapqandaımyn.

Senińder aıtqanymnan tanbasyma,

Kútemin qaǵbany kúıreter tańdy asyǵa.

Ár kúnim ony kútken maǵan azap,

Jer batad qus tósekten jambasyma.

Senseńder ishken balym ýmenen teń,

Kúıretpeı qaǵbany eńkish eńsem.

Aıryldym kúndiz kúlki, túnde uıqydan,

Derttimin, ish qusamyn jurtym senseń.

Qara tasty kúıretsem  qybym qanbaq,

Iemenniń atyna túsken salmaq.

Bul da bir sondyqtan da jan aıamaı,

Allanyń úıi ataǵan el-jurtty aldap.

Quraıshyqtardyń ótirigin shyǵarmyn,

Kim ekenin tanytam bir Allanyń,

Bul tek meniń armanym deı almaımyn.

-Iemenniń jaılaǵan gúlzar baǵyn,

Sizderdiń de múddeńiz dep bilemin.

Ózderińmen Sultannyń bir tilegi,

Qoldaıdy dep senemin meni bári,-

Dep Ábraha kúndeı bir kúrkiredi,

Teńizdeıin tolqyny jardy tepken,

Ábraha óz-ózinen isip-kepken.

Qanǵa bastap turǵanyn sezbegen ed,

Qarańǵy jurt Sultanǵa sózi óktem.

Bas shulǵysyp «basta» dep shýyldasqan,

Qıratpaq bop Qaǵbany dýyldasqan.

Dál sol bir sát Allanyń qudyretimen,

Qap-qara túnek bolyp túıildi aspan.

Eleń qylǵan joq muny jurttyń biri,

Keýdesinde jan barda árkim iri.

Allanyń asyqpaıtyny ámbege aıan,

Yzyńdaǵan kórsinbe shybyn qurly.

Ábraha kúıinip tepsingenin,

Meıirban Alla qorǵaǵan pendelerin.

Umytqandy túsirip táýbasyna,

Qahar atty jumsaǵan aq semserin.

...Joryqqa daıyndalyp alasurǵan,

Qaǵbany qalaı ǵana kúl etem dep.

Baqsy men qushynashqa bal ashtyrǵan,

Bal ashyp, jyny qozyp talyqsyǵan.

Balyqtaı bulqynyp bir shyqqan sýdan,

Sonan soń tynys alyp esin jıyp:

-Ekensiń adam emes, sen abjylan

Quraıysh túgil qorqady Alla senen,

Atalsa seniń atyń etedi eleń.

Sultanym, bul shaıqasta asad dańqyń,

Tolyp jatqan Qudaılar senen tómen.

Qaǵba shydamaıdy aıbatyńa,

Qaq aıyrar qaharman qaıratyńa.

Olardy jaǵympazdar jalǵastyrdy,

Dańqyń seniń tamsanyp san ǵasyrdy.

Artqa tastaıdy,

Qaǵbaǵa basta bizdi.

Sultanym, kesh qylmańyz erte kúndi,

Ábraha uıyp tyńdap ertegini.

Terisine syımaı bir

Al jelpindi,

Kel jelpindi.   

-Artyq jan qaıdan bolsyn, sirá, menen,

Qudaımen teńesip tur meniń tóbem,-

Dep oılap mártebesin eseledi,

Aqylsyz aqı kózdi eser edi.

Qalaısha keýde kerip maqtanbasyn,

Turǵanda aspanǵa órlep baqtalaıy

Naqty iske Ábraha kóshedi endi.

Habash bıleýshisiniń pilin alyp,

Qol bastaýǵa ysylyp tóseledi.

Mekkege alpys myń qol bastap keldi,

Aıbyny á degennen jasqantty eldi.

On úsh pilge arttyrǵan qural-saıman

Qaǵbany kómedi, qalmaıdy orny,-

Dep dúrlikti sol zamat eldiń kóbi.

-Quraıyshtar jol bermes buǵan tegi,-

Degenderdiń bilgender aýzyn japty.

Shamasy joq, olardyń az semseri,

Ol mingen pildiń aty Mahmut-ty

Biletin ony baıtaq Mekke jurty.

Mekkege taıap kelip jaýshy saldy,

Ábrahtaı qolbasshy zor úmitti.

Mekkege ásker kirmeı alǵash barǵan,

Barlaýshy top úrkitip lań salǵan.

Bolashaq paıǵambardyń atasynyń

Túıesin eki júzdeı tartyp alǵan.

Taǵy da jergilikti bir taıpanyń

Maldaryna qasqyrdaı aýyz salǵan.

Sol tusta Ábraha elshileri

Erkinsip, esirip bir jelpinedi.

-Basshysy quraıyshtyń kelsin beri!-

Degen soń Ábdimúttálip boı kórsetken.

-Mynany, áı, Ábdimúttálip usta,- dedi

Tirlikti munan ózge tasta,- dedi.

-Oqyp ber jurtyń muny uqsa,- dedi,

-Biz seni kútemiz osy tusta,- ded.

-Orynda, tez artyńdy qys ta,- dedi,

Ázireıilden árman ed sustary endi.

Ol hatta Ábraha bylaı degen:

 -Senderdi men qyryp-joıý oıymda joq,

Turǵam joq jáne meni moıynda,- dep.

-Keldim men Qaǵbany qulatýǵa,

Qarsylassańdar, qan josa qylam anyq.

Qynaptaǵy qylyshty qanǵa malyp,

Tiriń túgil ólgenińe salyq salyp.

Qyz bitkendi ketemin kúńdikke alyp,

Tuzdaı qylyp qurtamyn urpaǵyńdy,

Týmaǵandy jatyrdan jaryp alyp.

Qarsylaspasańdar!

Ketip pe shaıtan shalyp?

Mal jandaryń, turaǵyń aman qalmaq,

Zıan jasap birińe salman salmaq.

Shaıqasqysy kelmese Quraıyshtyń,

Basshysyna bul sózdi aıtam arnap.

Qasyma kelip tursyń myna meniń,

Sonda ǵana men oǵan artam senim.

Ábdimúttáliptiń elshige jaýaby:

-SHaıqaspasym onymen táńirge aıan,

Soǵysýǵa shamam joq jasyrmaımyn.

Ábrahanyń astam sózin

Basymnan asyraıyn.

Qaǵba – Alla úıi, ózi qorǵar,

Qırata almaıd

Alla úıin onan zorlar.

Osylaı dep ilesti elshimenen

Ábrahaǵa jolyqpaq.

Ábdimútálipti kóre sap,

Kelbetine, jarqyn júzine,

Kózi túsip tamsandy.

Kúle sóılep qonaǵyn,

Qushaq jaıa qarsy aldy.

Nege ekeni belgisiz

Suńǵaq boıy qonaqtyń

Ábrahaǵa sol sát oı saldy.

Áıtse de Ábraha senimine berik-ti,

Jigitten sonshama kórikti

-Ne tilegiń bar?- dep surady Ábraha.

-Áskeriń eki júz túıemdi...

Sózin bólip qabaǵyn túıip turyp,

Myna bizdi kelipti qudaı uryp.

«Qaǵbannyń baqtashysy- Quraıysh» dep

Syıladyq bilmegen soń biz tik turyp.

Quraıysh jazda Shamda erkindedi,

Al qysta Iemende tórkinde.

Bardaı-aq erkin kóship, en jaılady.

Tik turyp qyzmet qyp baqtyq bizder.

 Bulardy Qaǵba úshin

Al búgin ne der edińder buǵan sizder?

Qaǵbany qasıetti qoıa turyp,

Basyńa ne kún týdy túıeńdi izder?

-Áı, Ábraha, jón sózge  sen toqtaǵyn,

Kósemsinip  kókýin bul arada joq máni.

Men saǵan Qaǵbannyń ıesi bar dedim,

Qaǵbanyń ınshalla bastyrmaıd soqpaǵyn.

Qorǵaıdy sonsoń da jaq ashpadym.

Túıeler- meniki,

Maly emes basqanyń,-

Degende Ábraha ashýdan jaryldy,

Dirildep tynysy taryldy.

-Alla ǵoı sengenin kóreıin!

Salaıyn maıdanǵa barymdy!-

Degende Ábdimúttálip:

-Qatysym munyńa  joq,- dedi,- esh meniń,

Qaǵbany kóterip ket meıliń.

Jón bolar túıemdi aıdap ketkenim.

Oǵan ol túıesin qaıtardy,

Jolǵa sap Mekkege bettedi.

Jetken soń Mekege aman-saý

Qaıtarǵan maldaryn Ábraha qylmaı daý

Jolyna qurbanǵyp shalmaqqa

Jaratqan ıeniń

Belgi sap jiberdi aımaqqa.

Sonan soń halqyna Mekkeniń

Ábraha sóziniń bekerin,

Áskeri zulymdyq eterin.

Mekkege kirgen sát al olar

Ár jannyń túbine jeterin.

Dúnıe-múlkiniń shyǵaryp,

Kúl -kúlin tartyp-ap keterin.

Áıelin, qyzdaryn

Qol jaýlyq eterin.

Búkpesiz jasyrmaı uqtyrdy,

-Jaý bizdi tuıyqqa tyqsyrdy.

Qaǵbany Alla ózi qorǵasyn,

Biz qaıdan tappaqpyz yqtyndy?-

Dedi jurt Ábeńe jaltaqtap,

-Taý-tasty panalap kórińder jan saqtap,

Mekkeden ketińder alshaqtap.

Azaptan az kúngi bezinip júrmeńder,

Jaýlardyń qolynan jamsap qap.

Osy sóz talaıdyń kóńilin demedi,

Ábekeń shynshyl ed, er edi.

Qolynda kúsh joǵyn jasyryp,

Senderdi qorǵaımyn demedi.

Jol siltep Ábekeń jurtyna degeni:

-Qarsy tur, amal qyl ajalǵa!

Jaýyńa ólispeı berispe!

Aınalǵyn áp-sátte berishke.

Ólseń de orynyń peıishte,-

Degen sóz atadan balaǵa mıras-ty.

Qorǵady Otandy, mırasty.

Al bizder Qaǵbany jaýǵa qaldyryp,

(Jaý qolyn júrekke saldyrdyq).

Shyndyq bul ózekti órteıtin tym ashshy,

Áıtse de jerge uryp, ókinbe tymaqty.

Tiriniń tirligi jalǵaspaq,

Ólmegen adymdap alǵa aspaq,

Jaýmen jankeshti aıqaspaq.

Mekke - bul qalyń el turaǵy,

Qyrylmaq qarý ap aıqassaq.

Al qyrǵyn bizderge kerek pe?

Jelikken jel ókpe,

Qan ańsar qorekke.

Qaramas balaǵa, qarttarǵa,

Dúnıe boǵyńdy artarda.

Áketer tutqynǵa ulyńdy, qyzyńdy,

Quldyqqa, kúńdikke satýǵa,-

Degende el kóńili buzyldy.

«Qaǵbany kúl etem!» dep esirgen

Essizderge topyraǵyn taptatpa,

Qarys súıem adym alǵa attatpa.

Zulymdardyń zulym oıyn iske áste asyrma,

Qara nıet qarǵys aıtyp tasyrǵa.

Bir Allaǵa jalbarynyp jylady

Ábdimúttálip

Dostarymen erip kelgen qasyna.

Sonan keıin Qaǵbaǵa bettedi.

-Saqtaǵandy saqtaıtyn eń, jan Alla,

Oıda-joqta batqan myna munarǵa.

Mekke jurty basshysy edim men, Alla,

Qara basym Qaǵbadan sadaqa.

Al el-jurtty otqa salsam men, Alla,

Aqırette keshpes ediń sen, Alla.

Qaǵbany qıratpaq bop esirgen,

Bir sát bolsyn Mekke otyn óshirmek.

Zulymdyqty qalaı ǵana keshir em.

El -jurtymnyń

Qalaı ǵana shyǵaramyn esinen,

Men ózińniń qulyń edim máńgilik,

Óziń desem alaýlap jandy úmit.

Meıirimdi Alla qaharyń,da jeterlik.

Shirik penen kúpirlerdi ótinem,

Jaǵyp jiber kúlderin kókke kóterip.

 

Eges

Mekkelikterge jaǵynyp, jalpaqtap,

Ne ottap tur  Ábraha aqymaq?

Qara tasty ne tappaq úkkende,

Joq álde qýlyq qyp barmaǵyn búkken be?

Ábdimúttáliptiń qaıtardy túıesin,

Ol meniń, ne seniń tıesiń.

Baılyqtaryn jasyryp,

Qashqan jurt qýlyǵy asqan jurt.

Ne qaldy bizderge tıetin?-

Dep narazy únmen dúńk etti.

Áldekim ádildik súıetin,

Sol sátte bir epti janyna kep kúńk etti.

Úlesten qur qalam dep shataq shyǵarma.

Qara anaý taý-tasqa  adam ba, jyndar ma?..

Adam.

Al adam aınala almasyn munarǵa

Kókke ushyp sý bolyp sińbesin,

Sendeı er uǵar da.

Tek, tek ...dymyńdy shyǵarma

Ózińdi men izdep tabamyn,

Mekkelikterdiń tyqqanyn

Alaqanyńa salamyn.

Tek óziń sózińdi jutpaǵyn,

Aýzyńa bekem bol!

Tilerim jalǵyz-aq senen sol-

Jańaǵy sózińdi estise,

Dúrligip ereýil bastalad,

Qaǵyba qalady jaıyna,

Osyny paıymda.

Qabyrǵasyn Qaǵbanyń

Qaldyryp jaıyna,

Órleımiz taýǵa ana.

Qarýsyz qalyń el

Kóz jasyn seldetip beıne sel.

-Jan saýǵa, jan saýǵa...

Saspa sen tonaýdyń

Tabamyz amalyn.

Sheshýshi sátte tek taımasyn tabanyń,-

Dedi de jóneldi jylystap.

Taǵy da bir tún ótkendi jylystap,

Keıinniń jyny ustap,

Jaýdy ańsap julyspaq.

Qalyń qol ótkerdi,

Shabýylǵa buıryq joq tegi.

           

Buıryqtan soń

Mıladı 571 - jyl.

Muharram aıy bul.

17 - jeksenbi

Buıryq ta kep jetti endi.

Aqyrǵan aıbyndy ún

Terbedi jer-kókti.

Shabýyl bastalar tusynda

Jolbasshy Nýfaıl ıbı Habıb

Keldi de Mahmut pildiń tusyna:

-SHók, Mahmut, shók!- dedi.

-Sen Allanyń tarapynan

Qasıeti sanalǵan aımaqtasyń,

Turǵanda aman basyń,

Aıtqanymdy oryndasań,

Qutylasyń.

Kelgen jolyńmen keri qaıtpasań, tutylasyń,

Qaıtsań Allanyń kárinen qutylasyń.

Osylaı dep ózi taýǵa bettedi.

Al pil bolsa,

Shóge ketken-di.

Turǵyza almaı áskerler boldy álek,

Jabylyp turǵyzbaq bop kórdi demep.

Turǵyzbaq bylaı tursyn árbirden soń,

Sharshady qozǵaı almaı buǵan sebep.

Ne ekenin birde biri uǵa almady,

Iemenge, Shamǵa bursa

Tura shaýyp,

Qaǵbaǵa burǵanda burańdady.

Sylq etip, áli quryp tura almady,

Kórgender óz kózine ózi senbeı,

Bar desti munysynda sebep nendeı.

Talaıdyń shyjyǵan kúnnen kóni kepken,

Kóleńke izdeıtindeı tóńirekten.

Dál sol sát teńiz jaqtan ushqan qustar,

Burshaqtaı tasty ústerinen seýip ótken.

Tas tıgen tiri qalmaı jannyń biri,

Áskerdiń sherý tartpaq basyldy úni.

Shaǵyn qus uqsaıd túri qarlyǵashqa,

«Ábabıl» dep ataǵan quran muny.

Ábraha áskerine teńiz jaqtan

Ushyp kep, ústerinen tas boratqan.

Árqaısy alyp ushqan úsh tastan,

Burshaqqa ony Mekke halqy uqsatqan.

Qyzdyryp sol sátinde alǵan ottan,

Sodanda tas tıgender sulap túsken.

Alaýlap  qas qaǵymda kúıip pisken,

Kórgende tirileri tura qashqan.

Aıyrylyp á degende es pen tústen,

Betaldy beze qashyp shyǵandaǵan.

Báribir qalmaǵan-dy biri aman...

Allanyń qashsańdaǵy quryǵy uzyn,

Jaratqan jer men kókti jerdiń júzin.

Qor bolyp qaharyna tap kelgender,

Kúninde tańdamaqshar kórmeıd júzin.

Allanyń shashyńnan kóp alapaty,

Kórse de pende shirkin san apatty.

Sý tasqynyn, órt penen zilzalany,

Pendelikpen mán bermeı sandalypty.

Sonyń biri- Ábraha: «Qaǵbany

Joq qylam!»- dep kúpsinip qaǵynǵan-dy.

Qaǵbany qurytpaq bop qutyrynǵan,

Saıtanyn Alla ózi qaǵyp aldy.

Jarasy janǵa batyp, iriń aǵyp,

Zarlandy ol

Qudaıyna muńyn shaǵyp.

Álemde Alla- bireý, qalǵandaryn

Jalǵanshylar shyǵarǵan oıdan laǵyp.

Alla ózi Ábrahany qarǵady haq,

Qaǵbaǵa bolǵanda túsirmek daq.

İrip-shirip ótipti ómirden ol,

Qolyńnan kelse pende Allaǵa jaq.

«Taý maıa bop úıilip ólikteri»

Sý sepkendeı basyldy jelikteri.

Pana bolar janyna jer taba almaı,

Bezip berdi Ábrahanyń kóripkeli.

Allaǵa shek keltirgen bul bir pende,

Minezdi syńar ezý kónbes jónge.

Jarymes jalǵanynshyny kóripkel dep,

Allanyń quly bolsań múlde senbe.

Bir sózi tıgizetin myńǵa kesir,

Jaratqan quldaryndy óziń keshir.

Adastyrǵan sandardy  otyn óshir,

Sonda da solardan biz beze almadyq,

Qapy uryp qalsaqtaǵy kóp aldanyp.

Mekkege taǵy da biz oralaıyq,

Kúńirenip kúızelgen jurt sandalyp.

... Qan sasyp ketkendeı ed Mekke mańy,

Jaraly keıbiriniń shyqpaı jany.

Shyńǵyrǵan, bebeý qaqan daýystary,

Qulaq tursyn  qaradaı jeıdi jandy.

Shaıqasta opat bolý – soǵys zańy,

Ajalsyz jaralanar shyqpas jany.

Talaı jylǵa sozylǵan soǵystarda,

Dál mundaı tógilmegen adam qany.

Bul sózdi biletinder rastady,

Birazy ólip, birazy bop jaraly,

Negizi  saqtalatyn kóp quramy.

Qas qaǵym sát bolmaı-aq bul soǵysta,

Byt -shyt bop dushpan qoly qaqyrady.

Bolmaǵan buryn- sońdy soǵys mundaı,

Bul soǵys qarsylastan edi jurdaı.

Qarsy turǵan qarýly qol joq edi,

Jamsatty Ábraha qolyn

Patsha Qudaı

Ekeni eshbir talas týdyrmady.

Shýlady osylaı dep Mekke mańy,

Bul shyndyqty bul kúnde moıyndaıdy,

Álemniń hrestıany, musylmany.

...Qustar beıne ketkendeı sińip kókke,

Jaılady azaly ún tóńirekti.

Mekkelikter taý-tasty panalaǵan,

Úreılenip zarly úninen eńirepti.

Aspan men jer ketkendeı-aq  tutasyp,

Seldep jańbyr aǵyl-tegil sý tasyp.

Ólgenderdi, sel aǵyzyp pilderdi,

Alyp ketti kóz kórmeske tym qashyq.

                     

Tilek

Qulymyz bir Allanyń qulaq kesti,

Jan Alla sana berip syılady esti.

Muhammed paıǵambardyń úmbetimiz...

At-basyn jıi burar súrleýge eski.

Sol súrleý...

Qan maıdannyń soqpaǵy da,

Álemniń oqpen osar oqpany da,

Aınalǵan mıllıondardyń joqtaýyna.

Tynymsyz tógilgen qan

Toqtaýyna.

Peıildi sekildi bop kóringenmen,

Mezi bop kelis sózdiń kóp daýynan

Soǵysqa jol joq degen kúni keshe.

Keı eldiń alǵa qadam baspaýynan,

Jeligip daýdy qaıta bastaýynan.

Shoshynǵan quldaryńdy óziń qolda,

Armandary qalmasyn jarty jolda.

Quldaryń, Alla, ózińnen ótinedi

-Soǵystyń kúıdirmesin otty lebi,

Tursyn,- dep,- bar álemniń ashyq kógi.

 

(Ańyzdaǵy derekter Quran Kárimniń qazaqsha maǵyna jáne túsiniginen, Damıra Ómirzaqqyzy Ibragımniń «Adamzattyń asyl táji Muhammed (S.A.Ý.) paıǵambardyń ómiri» atty kitabynan alyndy).

Súleımen Baıazıtov

---