InfoHub Logo

Qashannan beri jatqany belgisiz, balaýyzdyń sórede jatqanyna kóp boldy. Eshkim ony kerek etpeıdi. Jarqyraǵan elektr jaryǵy bar. Biraq, balaýyz eshqashan da úmitin úzgen emes. Osy úıdegi adamdardyń tirshiligin syrttaı baqylap, kádege jarar kúnin sabyrmen kútip jata berdi.

Bul úıdiń de jandary ózge otbasylar sekildi, kúndiz ata-anasy jumysta, balalary sabaqta bolatyn. Keshke báriniń basy jınalǵanda, keshki astaryn ishe salyp, balalary kompúter aldyna, úlkender jaǵy demalatyn bólmedegi úlken teledıdar aldyna jınalatyn. Osylaısha birqalypty kúnder ótip jatty. Dańǵaradaı úıdegi adamdar bir-birimen syrlasyp, sóılesýden qaldy. Árkim ózimen-ózi áýre. Otbasylyq jylý joǵalyp bara jatqandaı. Osynyń bárin kórip júrgen balaýyzdyń adamdarǵa jany ashyp, sónip bara jatqan jylýdy qalaı jandyrý kerektigin oılaıtyn. Olarǵa shynymen de kómekteskisi keldi.

Bir kúni, qatty boran soqty. Qattylyǵy sonsha, elektr jelileri úzilip, búkil qala jaryqsyz qaldy. Elektr qýatyn tutynatyn qurylǵynyń báriniń basyna únsizdik týdy. Dál sol sátte sórede jatqan balaýyzdyń armany oryndaldy. Analary:

— Osy sórelerdiń birinde bir balaýyz bolǵan. Qane, izdeıikshi, - dep uıaly telefondarynyń jaryǵymen barlyǵy jabylyp, umyt qalǵan balaýyzdy izdeı bastady. Aqyry tapty-aý. Balaýyzdyń tabylýyn kútkendeı, uıaly telefondardyń da qýat kózi taýsylyp qaldy. Onyń astyna kishkene ydys qoıyp, tutatqany sol edi, tas qarańǵy úıge nur sebilgendeı boldy. Úıdegi jalǵyz jaryq - umyt qalǵan balaýyzdyń sáýlesi. Otbasynyń barlyq jandary balaýyz turǵan ústeldiń basyna jınaldy. Olar bir-birin tanymaıtyn, ortaq áńgimeleri joq adamdardaı biraz únsiz otyrysyp qaldy. Kenet otaǵasy:

— Balalar, osylaı únsiz otyramyz ba? Men senderge balalyq shaǵymdaǵy qyzyqty bir oqıǵany aıtyp bereıin, — dep, eń alǵash atqa minip úırengendegi qyzyqtary jaıly maıyn tamyzyp turyp áńgimelep berdi. Sodan keıin analary da, ózine kóılek tigemin dep, úlken matany qalaı keskilep tastaǵanyn aıtyp, bárin bir kúldirip aldy. Balalar da mekteptegi qyzyqtaryn aıtyp, ata-analaryn biraz tań-tamasha qyldy. Al balaýyz bolsa, óziniń armanynyń oryndalǵanyna tóbesi kókke jetkendeı bolyp, mazdap jana berdi, jana berdi. Qýanyshy qoınyna syımaı, osy bir meıirim, jaqyndyq ushqyny qaıta ornaǵan otbasynyń jylýyn sóndirip almas úshin, nuryn aıamaı tókti. Shattanǵannan sońǵy ret lap-lap jandy da, baıaýlap sóne bastady. Sol sátte elektr jaryǵy da samaldaı jarqyrap ketti. Biraq, buǵan eshkim de qýana qoımady. Olar áli de bolsa biraz otyra turǵylary kelgen edi.

Osylaısha, umyt qalǵan balaýyz óz armanyna jetip, bir otbasynyń adamdarynyń júregine bir-birine degen shynaıy analyq, ákelik jáne balalyq mahabbatty oıatypty. Sol keshten keıin úlken áser alǵan otbasy, keı kúnderi búkil jaryqty sóndirip, balaýyz jaǵyp qoıyp, qyzyqty áńgimelerin aıtyp, bir-birimen syrlasatyn bolypty.

---