InfoHub Logo

— Anashym, ertegi aıtyp berińizshi?!

— Jaraıdy, aıtyp beremin. Tek kesh batsyn.

— Ne úshin keshtiń batqanyn kútýimiz kerek?

— Bilmeımin...ertegini keshke tyńdaǵan jaqsy sıaqty.

— Jaqsy. Onda kelistik.

Qyzym kún batqansha áreń shydady. Qystyń kelte kúni áp-sátte keshke ulasty. Peshke jaǵylǵan ottyń qyzýy úıdi jylytyp jiberdi. Jaryqtyń sóndirseń, ottyń oınaǵan alaýynyń kóleńkesi  keregede oınaıdy. Osyndaı kezde bala kezdegi ata-anamnyń ortasynda esh alańsyz otyratyn kezderim esime  túsedi.

— Anashym, al, ertegińizdi bastańyz.

Qyzymnyń  qyzyǵýshylyqqa toly kózine qarap, jymıdym. Esime ádemi ertegi tústi.

— Ertegini jalǵyz óziń ǵana tyńdaısyń ba? Baryp, baýyrlaryńdy shaqyryp kel.

Qyzym cúıinshi suraǵandaı júgirip ketti.  Balalarym «ertegi, ertegi!» dep qýana aıqaılap júgirisip keldi. Aınala otyra qalyp, meniń aýzymdy baqty.

— Ertede bir qyz bolypty. Ol óte armanshyl bolǵan. Óz qıalynda jasap alǵan úıde meken etip, qıalyndaǵy keıipkerlermen tildesedi eken. Jer betindegi barlyq nárseni appaq tús sıaqty qabyldaıtyn-dy. Appaq aqsha bulttar, appaq qar sıaqty barlyq adamzat, jer beti tap-taza dep oılaıdy.Bir kúni qyz ákesi men anasynyń bir-birimen sóılespeı júrgenin baıqap qalypty. Sirá, renjisip qalǵan-aý.

— Olar nege renjisken eken?

— Úlkender keıde solaı bir-birine ókpelep qalady.

— Bir-birinen keshirim suraı salmaı ma?! Biz sóıtemiz ǵoı... sodan keıin oınap ketemiz.

— Sodan, olar tatýlasyp pa?

— Kishkentaı armanshyl qyz ata-anasyn qalaı tatýlastyrsam eken dep, túnimen terezeden japalaqtap jaýǵan qarǵa qarap oılanypty. Sóıtip jatyp uıyqtap ketipti. Tańerteń tura salyp, kıimderin kıip, dalaǵa júgirip shyǵypty. Dala appaq qarǵa oranypty. Týra óz qıalyndaǵy ertegi patshalyǵy sıaqty. Qyz qardy biraz tamashalap turypty da, dereý jalań qoldarymen qardy kósip alyp, jentekteı jónelipti. Anasy qyzynyń bul qylyǵyna tań qalyp, «Qyzym-aý, jaýradyń ǵoı. Úıge kirseńshi. Kún jylynǵan soń biraq shyǵyp oına» dep báıek bolady. Qyzy anasyn estimegen sıaqty qardy jentekteı beredi. Bir kezde qolyndaǵy qardy ala sala ákesine júgirip barady.

— Áke, áke, qarańyzshy, men qardan gúl jasadym. Ótinem, osy gúldi anama syılańyzshy. Qazir qys, esh jerde gúl óspeıdi.

— Qyzym-aý, mynaý qar ǵoı...

— Bul qar emes, qardan jasalǵan gúl...júrińizshi, anama syılańyzshy. Bulǵajaıyp gúl...

— Qyzy tabandap turyp alǵan soń, ákesi kóńilin qımaı jentektelip gúl beınesine keltirgen qardy alyp úıge kiredi.

— Al, anama syılańyz, - dep sybyrlaıdy qyzy.

— Mynaý saǵan...qardan jasalaǵan gúl...qyzymyz jasapty...

— Ádemi eken...

Anasy peshtiń janynda turǵan. Qolyn sozyp appaq qar gúldi aldy. Júzine jylý júgirdi. Adamnyń qolynyń tabymen úıdegi jylý qar gúldi erite bastady. Sý tamshylaı bastaıdy.

— Áke, áke, gúldi ustańyz. Áıtpese ol qazir erip qulap qalady. Mine men de ustaımyn.

Úsh alaqanǵa qonǵan appaq qar gúli tez erı bastady. Erip-erip jerge tamshylap jatty. Sýyqqa qyzarǵan alaqandar qaldy. Qardyń sýyq sýy qyzdyń ákesi men anasynyń renishin jýyp ketken sıaqty. Qyz qatty qýanyp ketti.

— Aıttym ǵoı, ol ǵajaıyp gúl dep...ertegi osymen bitti.

— Bitti me?

— Ata-anasy tatýlasyp pa?

— Iá.

— Jaqsy boldy ǵoı.

— Men tátemmen renjisip qalsam, sondaı gúl syılasam bola ma?

Men kúldim. Ertegini kishkentaılar jaǵy túsinbegeni anyq. Óıtkeni olar oıynǵa aınalyp otyrdy. Al es kirip qalǵan qyzdarym bir sátke qıaldap ketkendeı.

---