InfoHub Logo

Hýseıin qazynyń terezesiniń túbine kelip, eki jaman kıimdi tilenshi:

— Qudaı úshin, qaıyr berińiz, — dedi.

— Qudaı ózi berer, baryńyz, — dedi qazy.

— Paıǵambar aqy úshin.

— Eı, tilenshiler, endi basymdy aýyrtpaı ketińiz, — dep ashýlanyp, qazy oqyp otyrǵan kitabyn jerge atyp urdy.

— Ah, qazy, beısharashylyqqa bir nárse berseńshi, — dep tilenshiler ketpeı, jylap turdy.

Sonda qazy yza bolyp, ushyp turyp, jumyskerlerin shaqyryp buıyrdy:

— Mynaý bir-eki qydyryndyny zyndanǵa tastańyz, — dep. Biraq ol arada tilenshiler joq bolyp ketti.

Munan soń úsh kún ótken soń, qazyǵa kóp qonaqtar kelip, toı boldy. Qazynyń úıiniń ishi jarqyraǵan altyn, shamasyz sáýlet, ózi terezesin ashyp, sol tereze túbinde múftımen áńgimelesip, kózin Baǵdattyń qalasyna salyp otyr eken, sol ýaqytta tereze tusyna anakúngi eki tilenshi taǵy keldi.

— Qýanyshtaryńyz qaıyrly bolsyn, qazy, osy qýanysh ústinde bizdi de bir nárse berip qýantyńyz, — dep jylap turdy. Sonda qazy qasyndaǵy múftıge aıtty:

— Osy eki qydyryndy tilenshiler ekinshi ret kelip beımaza etedi, qalıpa qazireti osyndaılarǵa jaza buıyrmaıdy. Sóıtse de, bul joly buıryqsyz da bolsa, osy eki tilenshini ustatyp kisendetemin, Baǵdattaı qalanyń synyn buzyp, qydyryp júrmesin, — dep, adamdaryn shaqyrdy.

Sol ýaqytta eki tilenshiniń ózderi úıge kirip kelip, ústindegi eski kıimderin tastap, bireýi aıbatty daýyspen aqyrdy:

— Qazy, men seni qazy qoıǵanymda jurtqa qaıyrly, baıǵa, jarlyǵa birdeı, aq-saraǵat bı bolar ma eken dep úmit etip edim, bul jańylysyma toba qyldym. Japar! Mynaý ońbaǵan qurtty alyp, ádildikpen jazasyn ber, jurtym kórip-bilsin patsha quryǵy uzyn ekenin, erte me, kesh pe qylǵan jamandyq patshaǵa bilinbeı qalmaıtynyn, bilinse úlken-kishilikke qaramaı, jaza tartatyn, — dep.

Jyıylǵan qonaqtar bulardy tanyp, aıaqtaryna qulap jyǵylysty. Tilenshi bolyp kelip júrgen Harýnrashıt degen qalıpa patshasy, qasyndaǵy Japar degen ýáziri eken.

---