InfoHub Logo

Bir patshanyń hanymy aýrý bolyp, jurttan neshe-neshe dáriger jıdyryp, em etkizse de eshbir daýasy tabylmady. Patsha munan soń baqsy-balgerlerdi jıdyryp jarlyq aıtty:

— Baldaryńyzdy ashyp, osy hanymǵa ne em bolatynyn tabyńyzdar, eger tappasańyzdar bárińizdi de astyryp óltiremin, — dep.

Baqsy-balgerler qorqyp, sasyp turǵanda, ishinde bireýi aıtty: «Men bul aýrýdyń emin taptym». Sol sózben muny hanǵa alyp kelisti. Bul balger hanǵa aıtty:

— Dúnıede muńsyz kisi taýyp, sonyń kóılegimen qaqtyrsańyz, bul aýrýǵa sol em eken.

Patsha jer júzine jasaýyldaryn taratyp, qansha izdese de muńsyz adam tabylmady. Bireý baı, ne baqty bolsa balasy joq, ekeýi de bolsa ne qatyny, ne balasynyń meıirimi joq, bolmasa bireýlerden kórgen kemshiligi bar, bolmasa ne ózi, ne qatyn-balalary syrqaý, eń bolmasa sol aıtylǵannyń bárin qudaı bergen bolsa, qanaǵat joq bolǵannan ýaıymy kóp — taǵy ilgerirek bolmadym dep.

Kúder úzip, muńsyz adam joq eken dep qoıǵan kezde, bir kún patshanyń balasy kele jatsa, bir kedeı adam daladaǵy buzylǵan tamnyń túbine kelip aıtady: «Búgin jumysymdy bitirdim, qarnymdy toıdyrdym, endi ne ýaıymym bar, kel jatyp uıyqtaıyn» — dep, tamnyń qasyndaǵy jıyndy salam ústine jyǵyldy da jatty. Sálden soń qoryldap uıyqtap ta qaldy.

Patshazada muny kórip, muńsyz kisi taptym dep patshaǵa habar berdi. Patsha qýanyp, jasaýyldaryn jiberdi, ol muńsyzdy alyp kelińiz dep. Alyp kelgen soń, bul adamǵa altyn-kúmis berip, endi kóılegińdi ber dep qarasa, muńsyzdyń ústinde kóılegi de joq eken.

---