InfoHub Logo

Ertede bir qandyqol qaraqshy táýbe etkisi keledi. Ol Shaıqy Burqy áýlıege kelip:

— Men 40 jyl boıy qan tóktim. Zulymdyqtan basqa is jasamadym. Endi táýbeme keldim. Ne amal jasasam, Qudaı kúnámdi keshedi? — dep suraıdy. Shaıqy Burqy:

— Kóp táýbe et, minezińdi jaqsy jaqqa bur. Qulshylyqtaryńdy arttyr jáne jol shetine jemis aǵashyn ek. Ótken-ketken jolaýshylar saıasyna demalsyn. Jemisin jesin, shólin qandyrsyn, — deıdi.

Qaraqshy joldyń jıegine kóp aǵash egip, baptaıdy. Arada birneshe jyl ótkende aǵashy jaıqalyp, baqshaǵa aınalypty. Jolaýshy demalyp, kerýen at shaldyratyn shyraıly jerge aınalady. Bir kúni Shaıqy Burqy jolaýshylap kele jatyp, qaraqshynyń baqshasyna kezigedi.

— Bul kimniń baǵy? — dep suraıdy.

— Baqtyń ıesi joq. Jergilikti jurt «Qaraqshynyń baǵy» dep ataıdy. Qaraqshynyń ózi on jyl buryn dúnıeden ozypty, — deıdi.

Shaıqy áýlıe baqtyń jemisin jep, sol jerde túneıdi. Túsinde baıaǵy qaraqshyny kóredi. Ol jumaqtyń baqshasynda otyr eken. Tóbesinen nur tamshylap turady. Shaıqy:

— Qudaıym-aý, bul ne hıkaıat? Qaraqshynyń tóbesinen nur ne úshin tamshylap tur? — dep suraıdy.

— Munyń ekken aǵashynyń saıasyna san adam kelip demalady. Jemisin jeıdi. Sonyń saýaby ózine arǵy dúnıede óshpes azyqqa aınaldy, — deıdi. Shaıqy Burqy uıqydan kóńildi oıanypty.

Sodan bastap el arasynda «Aǵash ekseń, kúnáń jeńildeıdi», — dep nasıhat aıtypty.

---