InfoHub Logo

1924 jyly alǵashqy tikushaq áýege kóterilgennen keıin 1938 jyly AQSH Kongresinde senator F.Dorsı tikushaq qurastyrýdy usynady. Barlyq senator Dorsıdi qoldap, alǵashqy tájirbıelik tikushaq qurastyrýdy Amerıkadaǵy tanymal áýe qurylǵylaryn qurastyrýshy I. I. Sıkorskııǵa tapsyrady. Sıkorskıı úlken iske kirispes buryn, synaq retinde onyń kótergish qalaqtary men basqarý júıesiniń stendin jasap alady. Onyń jumysqa qabilettiligine kóz jetkizgennen keıin ǵana kelisim beriledi.

1939 jyldyń qyrkúıek aıynda VS-300 (nemese S-46) tikushaǵy qurastyrylady. Onyń syzbasy aýytqýdy retteıtin úıkelmeli kótergish úsh topsaly mehanızmnen turady. Tikushaqtyń kóldeneń jáne bir jaǵyna qısaıyp ushatyn qasıeti arnaıy mehanızmmen basqarylady. VS-300 tikushaǵynyń fúzelájy (ushaqtyń korpýsy) bolat qubyrlardan jasalǵan. Al korpýsyna tikushaqtyń artqy aralyǵy bolat quıylyp japsyrylǵan. Biraq bul tikushaqqa urys kezinde qarsylasty atýǵa arnalǵan qarý tirkelmegen.

1939 jyly 14 qyrkúıekte VS-300 tikushaǵymen I. I. Sıkorskıı ushyp baıqap kóredi, biraq, tikushaq jerden lezde kóterilip ketedi. Qaýipsizdik úshin aldyn ala tikushaqty jerge tórt qysqa sym arqanmen tartyp, qadap qoıady. Alǵashqy 1-2 mınýtta qalaq terbelisiniń áserinen kóp qıyndyq týady. Nátıjesinde,1939 jyly jeltoqsan aıynyń sońynda tikushaq ushý kezinde aýdarylady, abyroı bolǵanda, ushqysh aman qalady.

1941 jyly S-46 tikushaǵyn synaý jumystary jalǵasyn tabady. Atalǵan jyldyń sáýir aıynda bul tikushaq ushý uzaqtyǵy boıynsha Amerıkada rekord jasaıdy (1 saǵat 5 mınýt 14,5 sekýnd) jáne sý betimen usha alatynyn dáleldeıdi. VS-300 tikushaǵy, 1 saǵat 32 mınýt 40 sekýnd boıyna toqtamastan ushyp, álemdik rekord jasaǵan.

Al 1942 jyly VS-300 tikushaǵyna ǵylymı-zertteý jumystary júrgiziledi. Onyń ishinde, stabılızatory (ushaqtyń ıa dırıjabldiń teńdigin saqtaıtyn aspap) men fúzelájy, qalaqtary zertteýden ótkizilgen. Osydan keıin, 1943 jyldyń kúzinde VS-300 tikushaǵymen Sıkorskıı Brıjport qalasynan Dırborn qalasyna deıin ózi ushyp kelip, Ford murajaıyna tapsyrǵan. Álemde úlken tikushaqtardy qurastyrý osy oqıǵadan keıin beleń aldy.

---