Ómirde neshe túrli ýdy ishtim,
Neshe túrli azapqa, janym, tústiń.
Aǵaıynnyń ishinen ala shyqsa,
Jaý ishinde bar ma eken sonan kúshtiń.

Kúndeıdi, bálen deıdi kóre almaıdy,
Men kirgen qaýymǵa olar ene almaıdy.
Erteń jany shyǵatyn shubar jylan,
Sońyma jyldan artyq ere almaıdy.

Qara kóńil adalǵa sene almaıdy,
Aqty qara qashan da jeńe almaıdy.
Ómir boıy tilegen bir tilegin,
Mahmut búgin jaýyna bere almaıdy.

Bul jolda kerek emes jandy aıaý,
Ol onsha uzaq emes tur ǵoı taıaý.
Uly keýde yshqynyp jan berse de,
Shynashaqta qozǵalǵan qandy qoı-aý.

Men soǵan sózsiz áli-aq jetem deımin,
Shyn dosymmen qosylyp ketem deımin.
Ótken kúndi tek qana áńgime qyp,
Qalǵan kúnde baqytpen ótem deımin.

Ol oıym keshikpeı-aq bolýy anyq,
Kózim jetti sáýlesi kúnnen jaryq.
Shyn ómir, shyn ádildik sol kúnde ornap,
Men sekildi qýanar mıllıon halyq.

Sol kezde sóılesermiz qaımyqpastan,
Kóz jypyqtap et júrek shaılyqpastan.
Ótken kúngi surqıa sur jylandy,
Sóz qylyp shyǵararmyz talaı dastan.

Keıingi jas balalar oqyp kórer,
Keıde jylap, keı kezde saq-saq kúler.
Kim adam, kim aıýandyq istegenin,
Kimniń dos, kimniń qasyn anyq biler.

Sonda olar syn kózimen ádil qarar,
El jaýy kim ekenin dáldep tabar.
Sol jaýdyń urym-butaq tuqymyna,
Aıamaı ádilet zań balta shabar.

Armanym sol ómirdi kórsem eken,
Soǵan deıin adam bop júrsem eken.
Ómir boıy tilegen osy tilek,
Sarǵaıtyp saǵyndyrmaı kelseń eken.

---