Nazdy, názik, aq sáýle,
Kózdiń jasyn ıseń-aý!
Eljirep jas júregiń,
Mendeı bolyp kúıseń-aý!
Omyraýy ashyq aq kóılek,
Etegi qysqa kıseń-aý.
Erkeletip, buraltyp,
Eringe erin tıseń-aý.

Aq tisińdi aqsıtyp,
Mahabbatpen kúlseń-aý.
Aq torǵynǵa oranyp,
Taý ishine kirseń-aý.
Arasynda gúlderdiń,
Qoltyqtasyp júrsem-aý.

Arasynan toǵaıdyń,
Túrli jemis terseń-aý.
Mynany qara, janym,— dep,
Buralyp, kúlip, kelseń-aý.
Moınyma kelip asylyp,
Jemisińdi berseń-aý.
Jas baladaı erkelep,
Jalǵyz maǵan senseń-aý.
Kylyǵyńmen, nazyńmen
Erkimdi alyp jeńseń-aý.
Qaz alatyn qyrandaı,
Qaıyrylyp men de ilsem-aý.
Gúl, báısheshek ishinde
İsimdi ózim bilsem-aý.
Aqqan bulaq qasynda,
Sáýleli kún basymda,
Bulbul saırap qasymda,
Yrza bolam ómirge,
Ústip dáýren súrsem-aý.

Bir tomarǵa otyryp,
Aıaqty sýǵa malsam-aý.
Maıysqan aq qolyńmen
Denege sý salsam-aý.
Keıde sýdy shashysyp,
Keıde jabysyp qalsam-aý.
Kúlimdep kózge kóz túsip,
Aldyma qysyp alsam-aý.
Kıim japqan álemniń
Lázzatyna qansam-aý.

Úste sáýle altyn kún,
Qorshaǵan toǵaı nansań-aý,
Saıraǵan bulbul butaqta,
Kulaq qurysh qansań-aý!
Neshe túrli gúl ıisi
Iiskep mas bop qalsam-aý.
Kerilik kelmeı, jaz ótpeı,
Sondaı túrde qalsam-aý!

---