InfoHub Logo

Bir kúni Qoja kórshi aýylda sharýasy bolyp, tań sáriden jolǵa shyǵýǵa ázirlenedi. Sóıtse, dostary sol kúni Qojanyń úıinde bas qosyp, oıyn-saýyq jasamaq bolyp kelisip qoısa kerek. Májilistiń kórki sanalatyn Qojany jibergileri kelmeı, olar mynadaı ázil-ospaq oılap tabady: Qoja artynyp-tartynyp qoradan shyǵa bergende, birneshe adam jolyn bógep:

— Qaıda barasyń? — dep suraıdy. Qoja birneshe kúnge kórshi aýylǵa ketip bara jatqanyn aıtady.

— Eı, sorly, — deıdi dostary, — sen eshqaıda barmaısyń, sen ólip qalǵansyń. Sen bireýimizdiń týysymyzsyń, bireýimizdiń dosymyzsyń, sondyqtan seni taza arýlap jerleý bizdiń kórshilik boryshymyz.

Sonymen záresi ushyp, abyrjyı qalǵan Qoja baıǵusty kórshileri ýlap-shýlap meshitke qaraı súıreı jóneledi. Qoja qoryqqanynan qalsh qalsh etip:

— Jigitter, oıynnan ot shyǵady, qaljyńdy qoıyńdar. Búıte berseńder, men shynymen ólip ketýim múmkin. Jáne ana aýylda tyǵyz-taıań sharýam bar edi. Bosatyńdar, birge baratyn joldastarymnan kóz jazyp qalamyn, — dep jalynady.

Biraq qansha jalynǵanymen, Qojanyń sózine kórshileri qulaq aspaıdy, qur shýlaı beredi. Aqyrynda, Qojanyń úni óshedi. Jigitter ony kóterip ákelip, janaza shyǵaratyn taqtaıǵa jatqyzyp qoıady.

Sol kezde kóshede Qojanyń bir jaqyn dosy ótip bara jatady. Kórshileri ony da qaýmalap, jolyn bógep:

— Qoja dosyń dúnıe saldy, janazasyna qatyspaısyń ba? — dep, ana kisi «asyǵys jumysym bar edi» dese de, ýlap-shýlap jibermeıdi.

Sonda halsiz talyqsyp jatqan Qoja basyn kóterip:

— Eı, dos, sózińdi bosqa taýysyp qaıtesiń, báribir eshnárse ónbeıdi. Meniń sharýam senikinen de asyǵys edi, biraq ajal jetken soń, ne amal bar, mine, taǵdyrdyń jazǵanyna kónip jatqam joq pa, kóppen birge bolyp, óz qolyńnan topyraq salǵaısyń, — depti.

---