InfoHub Logo

Qoja birde toǵaıǵa otyn ala barǵanda bir qoıan ustap alady. Oǵan deıin qoıandy kórmegen de, bilmeıdi de eken. «Bu netken ǵajap ań edi! Úıge aparyp, jurtqa kórseteıin, bireý bolmasa, bireý qandaı ań ekenin biler», — dep oılaıdy. Qoıandy dorbaǵa sap, aýzyn myqtap baılap, úıine alyp keledi. Áıeline bir ǵajap ań ustap ákelgenin aıtyp, kórshi-qolańdy jınap kelgenshe dorbanyń aýzyn sheshpe dep eskertedi.

Adam árqashan da kórmegendi kórýge áýes emes pe, Qojanyń áıeli ońasha qalysymen: «Bu ne ǵajap eken, baıqap kóreıin» dep dorbanyń aýzyn sheshe bergende-aq qoıan atyp shyǵyp, túndik ashyq tur eken, shańyraqtan bir-aq sekirip ketedi. Esi shyǵyp qalǵan áıeldiń qolyna túsken arpa ólsheıtin aıaqty dorbaǵa salyp, qaıtadan aýzyn baılap qoıýdan basqa ister amaly bolmaıdy. Sonsoń túk bilmegen adam qusap otyra beredi. Kúıeýi oǵan ne esalań bireýdi ertip keletin, ne eshkim onyń aıtqanyna senip, erip kelmeıtin tárizdi kórinedi.

Biraq is júzinde basqasha bolady: Qoja dalaǵa shyqsa, qalanyń qonaqtan qaıtqan bir top ıgi jaqsy adamdary úıiniń janynan ótip bara jatyr eken. Olar Qojaǵa jolyǵyp biri surap, biri qostap, Qojanyń búgingi syryn aıtqyzady, sonsoń ǵajap ańdy kóremiz dep bári Qojanikine lap beredi.

Qoja olardy alqa-qotan jaıǵastyryp otyrǵyzyp, ǵajap ańnan qapyda aırylyp qalmas úshin qoldaryn joǵary kóterip otyrýdy ótinedi. Sonsoń baryp keregede ilýli turǵan dorbany alady. Antalaǵan jurttyń kózi endi dorbaǵa tigiledi. Qoja dorbany ortaǵa ákelip, aýzyn jaılap sheshedi de «pysh» dep silkip qalady. Dorbadan baǵanaǵy aıaq jerge top ete túsedi.

Sonda Qoja qysylǵanynan:

— Myrzalar! Osyndaı on aıaq arpa bir put bolady, — dese kerek.

---