InfoHub Logo

Ájesin saǵynǵaly qashan. Sonaý jazda barǵan. Qazir bir jas úlkeıdi. Endi kórse tanymaı qalatyn shyǵar.

— Úlkeıip ketipsiń ǵoı, qalqam-aý, — dep aıtary sózsiz.

Onda baqta jemis-jıdekterdiń pisken shaǵy bolatyn. Alma, almurttar syńsyp turdy. Ájesi olardan qaq jasaǵan. Al onyń bárin Aıgúl úıdiń tóbesine jaıady.

Ájesi kúnde keshkisin úı aldyndaǵy peshke ot jaǵady. Bul ýaqytta jelini jer syzyp, óristen ala sıyr keledi.

Azdan soń aspanda juldyzdar qaptap ketedi. Shegirtkeler shyryldaıdy. Ájesi ekeýi peshtiń aldynda qyzyl alaýǵa malynyp otyryp, sút pisiredi. Qazandyqtyń qasynda aıtqan áńgimeniń áseri bólek. Kópke deıin umytylmaıdy.

Jazǵy kúnderi olar dalaǵa, úıdiń aldyndaǵy sákige túneıtin. Aıgúl tipti qoryqpaıdy. Ájesiniń qoınyna syp etip kirip ketedi, ol: «Qońyr qozym!» — dep betinen súıedi.

Tańerteń bul turǵanda, ájesi ala sıyrdy kúrp-kúrp saýyp jatady. «Ták, ták, tynysh, qaıtedi-eı mynaý», — dep qoıady, ala sıyrǵa ursyp. Aıgúl uıqysyn qımaı biraz otyrady. Tańǵy tynyshtyqty buzyp, mashınalar qyrqaǵa órlep bara jatady.

Aıtpaqshy, ájesiniń kórshisiniń bir jylaýyq qyzy bar edi ǵoı. Ájesi ekeýi sol úıge barǵanda tanysqan. Sonda ekeýi jarysyp esep shyǵarǵan. Biraq kórshiniń qyzy túk bilmeıdi eken. Soǵan yzylandy ma, bolmashy bir nárseni syltaýratyp jylap jibergen…

Al qazir Aıgúl bárin saǵynyp otyr. Baqshanyń aıaǵynda bulaq bolatyn. Sodan kúnige sý ákeletin. Ájesiniń qara qasqa qoıynyń egiz tapqany da esinde. Qozylar kip-kishkene, qap-qara bolatyn. Olarǵa ol úıdegi kishkene ala mysyqty qosyp qoıatyn. Tipti úırenip alǵan soń, ala mysyq qozylardyń ústine jatyp uıyqtaıtyndy shyǵardy. Qozylar sekirip oınaqtaıtyn shamaǵa jetken soń, bunyń sońynan qalmaıtyn. Birese qýyp, birese qashyp júretin.

Búgin tańerteń ákesi:

— Daıyndal, ájeńniń aýylyna barasyń, — dedi.

…Endi, mine, olar ákesiniń kóligimen úlken qara jolǵa tústi. Dál osy jol ájesiniń aýylyna  aparady. Aıgúldiń júregi attaı týlap qoıa berdi.

---