InfoHub Logo

Birde oınap júrgen Aqerke úıge júgirip keldi. Qolyndaǵy jyltyraǵan saqına ispetti sary jezdi kórsetip, maqtanyp qoıady.

— Bylaı uıyqtap jatyr eken,— deıdi ol, eki alaqanyn qýsyryp, basyn jastyqqa qoıǵandaı qısaıtyp, zatty qandaı kúıde kórgenin sıpattap.

Qandaı dóńgelek zat bolmasyn, qulaǵan kezde jantaıyp jatary aıdan anyq. Áıtse de:

— Qaıtip jatyr eken? — dep áldeneshe qaıtara suraımyn.

Qýanyshy qoınyna syımaı turǵan ol qaıta-qaıta túsindirip álek.

Ótken jazdy ol aýylda ótkizdi. Áńgimeni bir qapshyq etip alyp qaıtsa kerek, tipti taýsylar emes.

— Men seni aýylǵa ertip baramyn,— deıdi ol.

— Iá,— dep, ótirik sengen bolam.— Meni aýylǵa ertip barshy…

— Sen taýyqtyń kishkentaı balapanyn jaqsy kóresiń be?— deıdi endi ol.

Kóz aldyma jumyrtqany jańa jaryp shyqqan aq úrpek balapandar elestep, jymıyp qoıam. Qyzymnyń qalada ósse de, qozy-laqqa, qustarǵa, tipti jándikterge degen qushtarlyǵynyń erekshe ekenin bilip, qýanyp qalam. Ol ózindegi qushtarlyqty eshqashan da joǵaltpasa eken deımin.

— Sen balapandy ustap alam dep qýma,— dep, endi ol maǵan aqyl aıta bastady.

Úlkender qansha tyıym salsa da, ustasań ýysyń tolmaıtyn súıkimdi balapandy áýes kórip, bala kezde qýatynym esime tústi. «Enesi kózderińdi shuqyp, jazym eter», — dep, anamyz shyrqyrap jany qalmaýshy edi. Shynynda da, kúrigi jazylmaǵan taýyq bundaı kezde eshteńeden de taıynbaıdy. Baıqap qalsa, qanatyn jaıyp, qýyp kep beredi. Óz betterimen beıbit kún keshken qustardyń tynyshtyǵyn buzýdyń ózi balalyq bilmestik eken-aý. Ne de bolsa, Aqerkeniń osyǵan kózi jetken.

— Sen ony ustap alyp, sýǵa da salma,— deıdi ol.— Óıtseń ólip qalady.

Iá, bala kúnimizde ondaı da tentektigimiz bolyp qalatyn. Balapandy ońashada qolǵa túsirgenge qýanǵan bir dosym ekeýimiz, sýǵa salyp oınaǵanbyz. Al álsiz balapan óldi de qaldy. Aq úrpek júni bolmasa, áp- áljýaz eken. Endi eshqashan qaıtalamaspyz degenbiz. Aıaq astynan qyzym sol qateligimdi esime túsirip tur. Men aıyby ashylǵan baladaı, betim qyzaryp, tómen qarap otyryp qaldym.

---