InfoHub Logo

Qonaq keledi dese, eń aldymen qýanatyn Aıdos. Oıyndy umytyp, as úıde júrip alady. Apasy pisirgen tátti taǵamdardy saýsaǵynyń ushymen bir shuqyp kórmeı, kóńili kónshimeıdi.

— Osy jaman ádetińdi qashan qoıasyń?— dep talaı márte eskertse de, qulaq asar emes.

Búgin de úıdegiler qonaq kútpek bolyp aldyn ala ábigerge túsýde. Bireý baılap qoıǵandaı Aıdos ta úıden shyqpaı qalǵan. Ádettegideı dúkennen arasyna meıiz qosylǵan bólke nan ákelindi. Keıingi kezde Aıdos bir qýlyqqa basqan. Ol nan juqa etip týralysymen-aq, arasyndaǵy meıizdi túk qoımaı jep qoıady. «Al endi bilip kór, meıiz qosylǵan ba eken, qosylmaǵan ba eken» deıdi ishinen máz bolyp. Onsyz da mol dastarqanda bári jetkilikti.

Kútken qonaqtar da kelgen. «Endi qur sarylyp otyra bermeı, oınap qaıtqanym jón shyǵar» dep, jylystap shyǵa bermek edi, Aıdosty da dastarqannyń basyna shaqyrdy. Oǵan sebep, qonaqtardyń arasynda ózi qatarly balanyń bolýy edi. «Atyń kim?», «Neshinshi synypta oqısyń?» degen sıaqty suraqtarǵa qysqa ǵana jaýap qaıyryp, bilekti sybanyp, kirisip kep berdi. Qonaqtar kemshiligin elemegensip:

— Aıdos tamaqty jaqsy ishedi eken, Erlan, sen de osy bala sıaqty bolsań qaıter edi?— dedi.

Erlannyń da kútkeni osy sóz eken, endi onyń da qoly ústeldi jaǵalaı bastady. Úlkender kóńildi qalyptaryn buzǵylary kelmedi me, kóz alartyp tyıym sala qoıǵan joq. Bir kezde qonaq bala nan arasynan jalǵyz túıir meıiz taýyp aldy. İle nandy túgel aýdarystyryp, meıiz izdeýge kiristi. Nanda biliner-bilinbes izi ǵana qalǵan, al ózi joq. Bireýdiń terip alǵanyn baıqaý qıyn emes. «Mundaı ádepsiz bala bolar ma,— dep Aıdos ishinen kijinip-aq otyr.— Meıiz jegisi kelse, molynan tur emes pe?» Onymen de qoıa qoısa meıli ǵoı, endigi sátte erekshe bir qylmysty áshkerelegendeı, jurtqa jar salyp:

— Nannyń ishindegi meıizdi bireý terip jep qoıypty,— dep, jurtqa kórsete bastady.

— Ol ne?— dep eleń etkender bul jaqqa jamyraı qadaldy. Árıne, kimnen kelgenin báriniń ishteri sezedi. Ústeldiń astyna kirip ketpese, endi

Aıdosqa sheginetin jer qalǵan joq.

— Tyshqan. Tyshqan jegen. Bizdiń úıde, tegi, kóp,— dedi qysylǵanynan.

Otyrǵandar kúlkileri kilt úzilip, tiksine qaldy. Beıne bir dastarqan ústimen sur tyshqan jorǵalap ótkendeı.

— Qaıdaǵy tyshqan? Tyshqan bunyń ózi!— degen qonaq balanyń sózi ǵana jurtty jadyratyp jiberdi.

Óziniń qaıdaǵy bir qap teser tyshqanǵa uqsap ketkenine Aıdostyń namysy keldi.

---