InfoHub Logo

Búgingi kúni mamandyq tańdaý qandaı jaýapty bolsa, bilim alatyn oqý ornyn tańdaý da sonshalyqty mańyzdy.Ýnıversıtetti tańdaý – bul árbir adam úshin mándi jáne kúrdeli sheshim. Óıtkeni, jarnamasy jer jarǵanmen bilim sapasy tómen oqý oryndary kóptep kezdesedi. Ál-farabı atyndaǵy Qazaq Ulttyq ýnıversıteti 1934 jyly ashylǵan kúninen bastap, ataǵy búkil Qazaqstanǵa taralǵan bedeldi joǵarǵy oqý oryndarynyń biri bolyp sanalady. Qazaq Ulttyq ýnıversıteti álemdegi eń úzdik 800 Joǵary Oqý Oryndary ishinde 165-orynǵa ıe bolyp otyr. Bul deńgeıge TMD elderi boıynsha eshqandaı oqý orny kirmeıdi. Bul kórsetkish meniń joǵaryda aıtylǵan sózderimniń aıǵaǵy dep esepteımin. 

Dıplomdy kez kelgen oqý ornynan alýǵa bolǵanymen, bilim men tájirıbeni tek bir jerden ǵana alýǵa bolady. Syrttaı taldaý jasaǵanda, basqalarǵa qaraǵanda osy oqý ornynyń artyqshylyqtary, jetken jetistikteri óte kóp. Solardyń ózimdi erekshe qyzyqtyrǵan bastylaryna toqtalar bolsam, birinshiden, bul ýnıversıtettiń 85 jylǵa jýyq tarıhy bar. Ol Qazaqstandaǵy bilim berý júıesiniń betke ustar kórki, ýnıversıtettik dástúrlerdiń, kásibı bilikti ǵylymı jáne pedagogıkalyq mektepterdiń bastaý-kózi bolyp tabylady. Ekinshiden, elimizdegi ulttyq statýsty ıelengen ýnıversıtterdiń aldyńǵy qatarynda tur. Qarap otyrsaq, ýnıversıtet álemniń júzden asa iri oqý oryndarymen jáne ǵylymı ortalyqtarymen turaqty baılanys ornatqan eken. Bul da erekshe artyqshylyq. Úshinshiden, ál-Farabı atyndaǵy Qazaq ulttyq ýnıversıteti – birinshi bolyp memlekettik attestasıadan ótken jáne barlyq mamandyqtar men dárejeler boıynsha bilim kyzmetin jasaıtyn, Qazaqstan Respýblıkasyndaǵy joǵary oqý oryndar júıesiniń kóshbasshysy bolyp tabylady. Ol – Qazaqstan JOO Basty reıtıńisi boıynsha birinshi orynda, memleketimizdiń tarıhynda alǵashqy bolyp Qazaqstan Respýblıkasy Prezıdenti syılyǵynyń laýreaty «Sapa salasyndaǵy jetistikteri úshin», Táýelsiz Memleketter Dostastyǵynyń «Qyzmetter pen ónim sapasy salasyndaǵy jetistikteri úshin» syılyǵynyń dıplomanty atandy. Bizdiń ýnıversıtetimiz Halyqaralyq ýnıversıtetter Asosıasıasynyń múshesi jáne Eýrazıalyq ýnıversıtetter Asosıasıasynyń uıymdastyrýshysy. Túlekterdi jumyspen qamtý Reıtıńisinde 500 JOO ishinen 251-orynǵa ıe bolǵan Ortalyq Azıadaǵy alǵashqy ýnıversıtet atandy. Mine, ýnıversıtetimniń búkil jetistikterin aıta bersek, ýaqyt jetpes. 

Qazaqstannyń barlyq ýnıversıtetterin muqıat zerttegende, ál-Farabı atyndaǵy Qazaq Ulttyq Ýnıversıteti elimizdegi eń úzdikterdiń biri bolyp tabylady degen qorytyndyǵa keldim. Ýnıversıtette asa baǵalaǵan nárselerimniń biri – onyń qonaqjaılylyǵy, kez kelgen másele boıynsha kómektesýge daıyndyǵy. Ujymy árqashan Ýnıversıtet tarapynan qoldaý taba alatynyńa sendiredi. 2019 jyly súıikti ýnıversıtetim maǵan Qytaı Halyq Respýblıkasyndaǵy eń úzdik Joǵary Oqý Oryndarynyń biri - Pekın Shetel tilder Ýnıversıtetinde bir semestr boıy oqýǵa múmkindik berdi, ol úshin meniń alǵysym sheksiz. Men Qazaq Ulttyq ýnıversıtetine durys tańdaý jasadym dep senimdi túrde aıta alamyn.

Shyǵystaný fakúlteti, qytaıtaný kafedrasy, 3-kýrs, shetel fılologıasy mamandyǵy stýdenti Begımova Alsý

Jetekshi: Sharypqazy N.

---