InfoHub Logo

Men 2021 jyly mektep bitirip, QazUÝ-ǵa mehanıka-matematıka fakúltetiniń robototehnıkalyq júıeler mamandyǵyna grantqa tústim. Grant konkýrsynyń nátıjesi shyqqan kezde óz kózime ózim senbedim, qatty qýandym.

Ál-Farabı atyndaǵy Qazaq Ulttyq ýnıversıteti Qazaqstandaǵy eń tanymal jáne bedeldi joǵary bilim berý uıymy bolyp sanalady. 88 jyl buryn qurylǵan ýnıversıtet búgingi tańda álemdik deńgeıdegi ataqqa ıe. Bul joǵary bilim berý uıymy tek úzdikterdiń biri ǵana emes, sonymen qatar elimizdegi eń iri ýnıversıtetterdiń biri. Ýnıversıtet quramyna 16 fakúltet, 67 kafedra, 32 ǵylymı-zertteý ınstıtýty men ortalyqtar kiredi.

Bul ýnıversıtettiń kóptegen jaqsy jaqtary bar. Meniń oıymsha, ýnıversıtettiń basty artyqshylyǵy - ár stýdenttiń boıynan erekshelikterdi, talanttardy tabýǵa tyrysatyn jáne olardy damytý úshin baryn salatyn, múmkindiginshe bar bilimimen bólisip, baǵaly keńester beretin oqytýshylar bolyp tabylady.

Men úshin ýnıversıtet - ómirde adamdardy jáne óz-ózimdi tanýdyń tásilderiniń biri. Bilim alý jolynda ýnıversıtet óte jaqsy «motıvator» bolyp tabylady, óıtkeni sizdi áreket etýge, kúresýge jáne ár ýaqytta sizdiń jeke tulǵa bolý quqyǵyńyzdy dáleldeýge májbúr etedi. Dál osy sebepterge baılanysty men Ál-Farabı atyndaǵy Qazaq Ulttyq ýnıversıtetin tańdadym. Bul ýnıversıtettiń ózindik erekshe atmosferasy bar. Munda oqý da, ómir de bar. Munda jumys, shyǵarmashylyq jáne sport bar. Sonymen qatar, bul ýnıversıtettegi bilim deńgeıi tek elimizdegi ǵana emes, álemdik arenadaǵy da joǵary talaptarǵa saı keledi.

Qala ishindegi «Kazgýgrad» qalashyǵy dep atalyp ketken qutty mekende stýdentterdiń bilim alýyna barlyq múmkindik jasalǵan. Ó.Joldasbekov atyndaǵy 1600 oryndyq stýdentter saraıy, TMD elderindegi jalǵyz úlken aýqymdy «ál-Farabı» kitaphanasy, sportkesheni men stadıon, jańa ǵımarattar, áskerı kafedra, tehnopark, 5000 stýdentke arnalǵan stýdentter úıi, medısınalyq ortalyq jáne stýdentterge qyzmet etý ortalyǵy stýdentter ıgiligi úshin qyzmet jasap otyr. Stýdentter saraıynda ónerli stýdentterge arnalǵan stýdentter klýby jumys atqarady. Stýdentter klýbynyń daryndy músheleri talaı baıqaýlardyń jeńimpazdary. Sonyń biri retinde, «Baqyt» bı ansamblin erekshe atap ótýge bolady. Ýnıversıtetimizde dástúrli túrde «Jalyn» birinshi kýrs talanttaryn anyqtaý, «Stýdenttik kóktem», KVN, «Ana tili arýy-Jigit sultany» sıaqty baıqaýlar joǵary deńgeıde ótkizilip turady.

QazUÝ 400-den astam sheteldik ýnıversıtettermen yntymaqtastyq týraly kelisim jasaǵan. Osy negizde magıstrant, doktoranttarǵa eki adamnyń jetekshilik etý tájirıbesi keńinen óristep otyr. Bir ǵylymı jetekshi Qazaqstannan bolsa, ekinshisi – shetel JOO-daǵy belgili ǵalym. Osynyń bári de QazUÝ stýdentteri úshin halyqaralyq deńgeıde oqyp, zertteýler júrgizýge laıyqty jol ashady.

QazUÝ-dy elimizdiń barlyq joǵary bilim berý júıesiniń tiregi, bilikti mamandar ordasy deýge bolady. Ýnıversıtettiń myńdaǵan túlekteri Qazaqstannyń jáne onyń aýmaǵynan tys jerlerdegi óndiristiń barlyq salalarynda tabysty eńbek etýde.

Ábdiǵalı Mereı QazUÝ mehanıka-matematıka fakúltetiniń 1 kýrs bakalavrıanty. Jetekshi: Ýrazgalıeva.S.A

---