InfoHub Logo

Arystan búkil ań balasyna patsha bolyp turǵan kezde, ádil bılik júrgizip, eldiń qurmetine bólenýdi oılapty ári solaı da istepti. Bir kúni arystan bir tóbege shyǵyp otyryp, jaıylyp júrgen kóp ala qoıdy kórip kóńili buzylypty. Sonymen aıý men túlkini shaqyryp ala qoılardy qalaı bir jaıly etýdi aqyldasypty. Sonda aıý turyp:

— Taqsyr, qoıdy kim adam qataryna alady, olardyń kózin qurtyp qana tastaǵan jón, — deıdi tótesinen. Muny estigen arystan qabaǵyn túıip:

— Óltirý ońaı, óz jurtymdy ózim qyrsam, jalmaýyz patsha atanyp, jaman atqa qalamyn ǵoı, — deıdi.

Sonda túlki:

— Taqsyr, aıtqanyńyz jón, jaman atqa qalmańyz, menshe, osy qoılarǵa bir saıdy berińiz de, jaqsy bir qoıshy qoıyńyz, — deıdi. Arystan az oılanyp:

— Senshe kim jaqsy baǵady, — deıdi.

Túlki:

— Qasqyrǵa jetetin qoıshy joq, — deıdi jymıa.

Sonymen arystan qasqyrǵa tabanda qoılardy jaqsy baǵý týraly buıryq túsiredi. Ala qoılar da az ýaqytta arystannyń kózinen ǵaıyp
bolady.

---