InfoHub Logo

Ol kezde Krasnovodsk qalasynan iri óndiris oshaǵy — Bekdashyǵa jurt "kýkýrýznık" atap ketken on eki adamdyq, dyryldaǵan "AN-2" ushaǵymen qatynaıtynbyz. Basqa kólik júrmeıtindikten baryp-kelý "problema". Ne bılet bolmaıdy, ne aýa raıy qolaısyz bolady. Sondaı sebeppen eki kún ushpaǵan ushaq ushatyn bolyp, jolaýshylar abyr-sabyr kúıge tústi. Birneshe tekserýden ótip, ushaqqa da jaıǵastyq-aý áıteýir. Eń sońynan mingendikten men dál esiktiń tusyndaǵy orynǵa jaıǵastym. Shalqalaı ashylǵan esikten syrtqa kóz salyp otyrǵanmyn. Kenet qaqpadan álginde bizdi jetektep ákelip ketken, bet-aýzyn aıamaı boıaǵan, aeroport qyzmetkeriniń formasyndaǵy tolyq áıel uzyntura orysty ertip shyǵa bergeni sol-aq edi, daýys salǵan aq jaýlyqty áje áldekimderdiń bógemek bolǵandaryna qaramaı janushyra aqsańdap, súıretilip keledi. "Toqtańdar, meni de ala ketińder, qudaı úshin",— dep jylarman bolyp, aıqaı salady. Jurt ańtaryla qarap qaldy.

— Men sizge taǵy qaıtalap aıtamyn, bul basqa reıs, — dedi orys tilinde aeroport qyzmetkeri.

— Áı, moıa, meniń reısim, — deıdi keıýana kózinde jas, qolynda bıleti, álgilermen qaptaldasyp qalar emes.

Shydaı almadym.

— Shesheı, qane, bıletińizdi berińiz, kóreıin!, — dedim. Ornymnan kóterilip, bıletin aldym. Sol-aq eken aeroport qyzmetkeri de, oǵan erip kelgen uzyntura da sasqalaqtaı bastady. Bıletke úńilsem, reısi, nómiri de, ýaqyty da saı kelip-aq tur. Jurt túgel estisin degendeı daýysymdy kóterip, bar orysshama salyp:

— Ájeıdiń osy reıske bıleti bar, kúni, saǵatyna deıin mine, dál kelip tur, sonda bul kisi qalaısha qalýǵa tıisti, — dep bıletti joǵary kóterdim.

Uıalǵan tek turmas degendeı:

— Jigitim, sizge túsýge týra kelip tur, — dedi oıy iske aspaǵan aeroport qyzmetkeri beti búlk etpesten bireýdiń ornyna áp-sátte jaıǵasyp úlgergen uzynturaǵa. Ájeıdi qoltyǵynan demep, bos orynǵa jaıǵasýyna kómektestim.

— Táńir jarylqasyn, shyraǵym, eki dúnıede jamandyq kórme, — dep alǵysyn jaýdyrýmen boldy. Baıqap otyrmyn, kópke deıin aptyǵyn basa almady.

Iá, "úndemegen úıdeı báleden qutyladyǵa" salǵanymyzda, jazyqsyzdy japa shektiretin taǵy bir ádiletsizdik bolar ma edi, kim bilsin. Áıteýir men álsizge sál de bolsa járdemim tıgenine qýandym.

---