InfoHub Logo

«Altyn tulpar» jarystarynyń jeńimpazy 10 mıllıon teńge utyp aldy. Alaman báıge boıynsha respýblıkalyq týrnır elordadan 30 shaqyrym jerde Qabanbaı batyr aýylynda ótti, dep habarlady «Habar 24» telearnasy.

Shabandozdyń sheberligi, sáıgúliktiń shydamdylyǵy - kez kelgen báıgeniń basty ólshemderi. 51 shaqyrym qashyqtyqty eńserý úshin edáýir tabandylyq kerek.  Almaty mańyndaǵy Degeres kentiniń 13 jasar turǵyny Ashat Álimjanov Jannur atty sáıgúligimen jarysqa ótken jyldan beri qapysyz daıyndalǵan bolatyn. Bul eńbek esh ketpedi. Júırik at qojaıynyna jeńis áperdi.

«Ótken jyly jarysta men úshinshi orynǵa ıe bolǵan edim. Bıylǵy jyly barynsha tyrystym. Mundaı deńgeıdegi báıgede buryn-sońdy jeńiske jetpegen edim. Men óte qýanyshtymyn», - dedi Ashat.

Bıylǵy jylǵy týrnırge elimizdiń túpkir-túpkirinen  67 tájirıbeli shabandoz jınaldy. Onyń eń jas qatysýshysy 12 jasta boldy, tórt aınalymdy shaýyp ótý qajet edi. Uıymdastyrýshylar kelesi jyly báıge qashyqtyǵyn taǵy da 9 shaqyrymǵa uzartpaq.

«Ótken jyly biz sáıgúlikterdiń qarymyn tekserý úshin qashyqtyqty 51 shaqyrymǵa deıin ulǵaıtýǵa sheshim qabyldaǵan edik. Búgin biz júırikterdiń budan da uzaqqa shaba alatynyn kórip otyrmyz. Bul árıne, shabandozǵa da, báıgege qosylǵan attarǵa da ońaı emes. Biraq ta báıge - bizdiń halqymyzdyń rýhanı ıgiligi, sondyqtan da biz ony damytý túsýimiz qajet», - dedi jarys tóreshisi Máýlit Qojataev.

Ekinshi oryn men 3 mıllıon teńge júldege Qaraǵandy oblysynan Qınas Qojahmetov ıe boldy. Jambyl ókirinen Nurjan Eginbaev úshinshi orynǵa jáne 2 mıllıon teńgege ilikti.

Aıta keteıik, alǵashqy 9 shabandoz júldeli boldy.

---