InfoHub Logo

29 qańtar kúni Almatyda «Álemniń ekinshi ustazy» atanǵan Ábý Nasyr ál-Farabı babamyzdyń 1150 jyldyǵy saltanatty túrde start alady. Ótken jyly-aq zamanalardyń  ǵulama ǵalymynyń mereıtoıyna arnalǵan úlken daıyndyqty onyń kindik qany tamǵan Qazaq eli bastap ketkendi.

Osy turǵydan kelgende, dúnıejúzinde ál-Farabıdiń atyn ıelenip otyrǵan jalǵyz ýnıversıtet – ál-Farabı atyndaǵy Qazaq ulttyq ýnıversıtetine de artylatyn júk az emes.

Byltyr ýnıversıtettiń tikeleı muryndyq bolýymen 2-12 sáýir aralyǵynda 10 kúnge sozylǵan  VI Halyqaralyq Farabı oqýlary ótti. Sheteldik shyǵystanýshy ǵalymdar Farabı forýmyn óte joǵary baǵalady. Forým barlyq deńgeıde til úıretetin sheteldik mamandardy jınady.

Osy aýqymdy oqıǵaǵa ázirlik barysynda qyrkúıek aıynda qazaqstandyq arnaıy delegasıa Sırıanyń Damask qalasyna issaparmen bardy.

Atalmysh issapar Qazaqstan Respýblıkasynyń Lıvandaǵy Elshiliginiń jáne Sırıa Respýblıkasynyń Qazaqstandaǵy qurmetti Elshisiniń qoldaýymen júzege asty. Osylaısha bul sapar uly babamyzdy zıarat etip, jatqan jerine Qazaqstan tarapynyń qarjylandyrýymen salynǵan «Ál-Farabı mádenı tarıhy ortalyǵy jáne kesenesi»  qurylysynyń jaı-kúıimen jaqynnan tanysyp, 2020 jyly uly oıshyldyń 1150 jyldyǵyn ótkizýge daıyndyq sharalaryn jalǵastyrdy.

Ál-Farabıdiń mereıtoıy kindik qany tamǵan Otyrardy da aınalyp ótken joq. Osynaý taǵylymdyq mán-mańyzy zor ulaǵatty iske ózindik úlesterin qosýdy nıet etken otyrarlyq ónerpazdar maqtanysh tutar jerlesteriniń  halyqaralyq aýqymdaǵy mereıtoıy qurmetine oraı, dramatýrg Shahmet Qusaıynovtyń «ál-Farabı» spektaklin usyndy. Bilikti rejıser Ǵazız Arynovtyń sahnalaýymen sátti shyqqan bul týyndyny qyzyǵy tamashalaǵan kórermenderdiń qarasy kóp boldy.

Al  29 qańtar kúni Almatyda ál-Farabı atyndaǵy Qazaq ulttyq ýnıversıtetinde ál-Farabıdiń 1150 jyldyq mereıtoıy resmı ári saltanatty túrde bastaý aldy. IýNESKO qamqorshylyǵymen halyqaralyq aýyqymda keńinen atalyp ótetin ál-Farabıdiń mereıtoılyq jyly álemniń 40-tan asa elinen qonaqtardyń basyn qosty.

Saltanatty sharaǵa Memlekettik hatshy Qyrymbek Kósherbaev, Bilim jáne ǵylym mınıstri Ashat Aımaǵambetov, Mádenıet jáne sport mınıstri Aqtoty Raıymqulova, Almaty ákimi Baqytjan Saǵyntaev, memleket jáne qoǵam qaıratkerleri, BUU jáne IýNESKO, IYU, TÚRKSOI, sonymen qatar basqa da halyqaralyq uıymdardyń, Qazaqstandaǵy dıplomatıalyq mısıalardyń ókilderi, JOO rektorlary, ǵylymı ortalyqtar men ǴZI jetekshileri, tanymal sheteldik jáne otandyq ǵalymdar-farabıtanýshylar qatysty.

Tústen keıin mártebeli qonaqtar ál-Farabı eskertkishine gúl shoqtaryn qoıdy, sodan keıin Stýdentter saraıynda ál-Farabıdiń 1150 jyldyq mereıtoıy saltanatty túrde ashylyp, sońy merekelik konsertke ulasty.

A.P. Jańabaı ál - Farabı atyndaǵy QazUÝ - dyń 2 kýrs magıstranty

G.S. Bedelova  ál - Farabı atyndaǵy QazUÝ - dyń t.ǵ.k., aǵa oqytýshysy

---