InfoHub Logo

Bilim jáne ǵylym mınıstri Ashat Aımaǵambetov Joǵary oqý oryndarynyń oqytýshylarynyń aılyǵyn arttyrý joldaryn atady.

Bilim jáne ǵylym mınıstrliginiń aparattyq otyrysynda baıandama jasaǵan vıse-mınıstr Mıras Dáýlenov qazirgi ýaqytta 30 JOO-da oqytýshylardyń aılyǵy 30 paıyzǵa kóterilgenin jetkizdi. Dese de olardyń ortasha jalaqysy tómen kúıde qalyp otyr.

«Mektep muǵalimderiniń aılyǵynan JOO oqytýshylardyń jalaqysy az. Osyǵan baılanysty JOO oqytýshylary mektepke ketip jatyr. Mundaı tendensıanyń kúsheıip bara jatqanyn da baıqaýǵa bolady. Sol sebepti memlekettik JOO-larda granttardyń sanyn arttyrý kózdelýde», - dedi ol.

Bul máselege qatysty Bilim jáne ǵylym mınıstri Ashat Aımaǵambetov Qazaqstandaǵy JOO oqytýshylarynyń jalaqysy óte tómen bolyp turǵanyn jetkizdi.

«Memlekettik bilim berý jáne ǵylymdy damytý baǵdarlamasy sheńberinde bıyl granttardyń quny birneshe ese ósedi. Bul qandaı nátıje beredi? Birinshiden, bizdiń oqytýshylardyń jalaqysyn arttyrýǵa múmkindik beredi. Ǵylym salasynda da qarjylandyrý birneshe ese ósip jatyr. Sondyqtan osy ózgeristiń bári óziniń septigin tıgizýi tıis. Jalaqy máselesi boıynsha tıisti jumys júrgizý kerek. Birinshiden bizdiń ýnıversıtetter (memlekettik ýnıversıtetter boıynsha) tıimsiz shyǵyndardy qaıta qaraýy tıis. Ártúrli tıimsiz forýmdardy, sharalardy qysqartý kerek. Prezıdent qańtar aıynda Úkimettiń keńeıtilgen otyrysynda osyndaı tapsyrma bergen bolatyn. Ol tek mınıstrliktiń apparatyna qatysty emes, ol kvazımemlekettik mekemelerge de qatysty másele», - dedi mınıstr.

---