InfoHub Logo

ALMATY. QazAqparat- Búgin Almatyda Q. Sátbaev atyndaǵy QazUTZÝ bazasynda ótken «TechGarden's Smart Industry STARTUP DAY» baıqaýy barysynda oǵan qatysýshylar jer qoınaýyn paıdalanýshylardyń aldyna qoıylǵan tehnologıalyq mindetterdi sheshý boıynsha ózderiniń ınovasıalyq jobalaryn usyndy.

«Búgingi is-sharanyń maqsaty - elimizde ınovasıalyq qyzmetti damytý úshin jer qoınaýyn paıdalanýshylar men tıisti ǵylymı-zertteý ınstıtýttaryna osyndaı dıalog alańyn usyný.

Bul jerde kompanıalardyń jyldyq jıyntyq tabysynyń 1 paıyzy arqyly qarjylandyrýǵa úmitker jobalar jınaqtaldy», - dedi óz sózinde «Almaty Tech Garden» ınovasıalyq tehnologıalar parki» Avtonomıalyq klasterlik qorynyń dırektory Sanjar Kettebekov.

Úmitkerlerdiń sońǵy bir aı boıy www.techgarden.kz saıtynyń on-line qyzmeti arqyly baıqaýǵa qatysýǵa ótinim berýge múmkindigi boldy.

Ken óndirýshi kompanıalardyń aldynda turǵan naqty tehnologıalyq mindetterdi sheshýge baǵyttalǵan úzdik segiz jobanyń ıesi qazylar alqasynyń aldynda óz jobasyn qorǵaýǵa múmkindik aldy. Eger laıyqty qorǵap shyqsa, onda olar aldaǵy ýaqytta atalǵan kompanıalardyń merdigeri retinde óz sheshimderin júzege asyra alady.
S. Kettebekovtyń aıtýynsha, «Smart Industry STARTUP DAY» - jańadan bastap kele jatqan jas startaperler ǵana emes, jer qoınaýyn paıdalanýshy kompanıalar úshin de mańyzdy baıqaý. Bul kompanıalar jańa jobalardyń sheshimeri arqyly óz óndirisiniń tıimdiligin arttyra alady.
«Biz bul startap jobalarǵa bastan aıaq jetekshilik jasaımyz. Sondyqtan, baıqaýdyń bir júldesi retinde Almaty Tech Garden parkinde startap-jobany jetildirý boıynsha úsh aılyq baǵdarlama qarastyrylǵan», - dedi ol.

Avtor: Aıbota Japparbergen