InfoHub Logo

Toqsanynshy jyldardyń basynda Jańaózen qalasy ákiminiń orynbasary bolyp qyzmet istedim. Óte qıyn kezder, joqshylyq, komsomoldan qaýsap qalǵan, eski "Volga" avtomashınasy tıdi. Qosalqy bólshekter tapshy. Júrgizýshim Alpysbaı degen jigit qurap-surap birdeńe qylady, áıteýir. Biraz júrgennen keıin motory "syr berip" toqtap qalamyz. Alpysbaı kapotty ashyp tastap, sybana kirisedi, mashınanyń astyna úńiledi, keıde ıterip ot aldyramyz.

Birde tańerteńgilik mashınaǵa otyryp jatsam, artqy orynda on eki-on úshter shamasyndaǵy bala otyr.

— Mynaý qaı bala?, — dep Alpysbaıǵa qaradym.

— Meniń balam ǵoı, — dep kúledi.

— Jaı júr me, tynyshtyq pa? — dedim aldaǵy qyrýar sharýalar esime túsip.

— Sabaq oqymaıdy. Sosyn bir mashınadaǵy oqyǵan adam men oqymaǵan adamnyń qandaı kúıde júretinin óz kózimen kórsin dep, ádeıi alyp shyqtym, — dedi Alpysbaı. Men ne deıin. Alpekeńniń balaǵa sabaq oqytýdaǵy qoldanǵan "aılasyn" teris ne oń deı almadym. İshteı kúlip qoıam, sabaq oqyǵan, bilim alǵan jaqsy-aý, biraq balanyń kim bolaryna taǵdyry tóreshi, bári bir Allanyń qolynda ǵoı. Árıne, Alpysbaıdyń "aılasy" ońynan oralsa, biz de qýanar ek...

---