InfoHub Logo

Bes qabatty úıdiń birinshi qabatyndaǵy tórt bólmelikte Qaıyrbaı aqsaqal, al ekinshi qabatynda biz turamyz. Ol aǵamyz kisini jatsynbaıtyn, bir kórgennen-aq baýrap alatyn kórindi maǵan. Oǵan qosa jasy jetpisten assa da elgezek, pysyq, qaı kezde kórseń de bala-shaǵanyń, týǵan-týys, aǵaıynnyń jaıyn oılap júredi.

Birde qyzmetten kele jatqanymdy kórip, sonadaıdan toqtaı tur degen belgi berdi. Sálemdesip, jaı-japsar surasqannan keıin, sózin bastap ketti:

— Shyraǵym, bizge bótendigiń joq túbi bir shaldyń baldarymyz. Jáne qazekem "Aǵaıynnyń aty ozǵansha, aýyldastyń taıy ozsyn" dep tekten tekke aıtpaǵan, birazdan beri qońsy turamyz, syrtyńnan súısinip, maqtan tutyp júrgen inimsiń, óziń bilesiń ótkende meniń úlkenim, Kámshatym uzatylyp, toıy boldy ǵoı...

— Qaıyreke, toıyńda bolǵanymyzdy... — dep bastaı berip em, ózi jalǵastyryp áketti:

— Bolǵanyńyzdy bilemin, meniń aıtaıyn degenim, erteń sol qyzymnyń qudalyǵy, jaqsy kóretin kórshiles inim retinde eresiń, birge baramyz, — dep túıip tastady.

Birdeńe dep sózin qaıtarýdyń ne syltaý aıtyp qala berýdiń yńǵaıyn tappaı amalsyz kóndim. Qudalyq degen jaqsy ǵoı! Kóńildi, jan súısinerlik jaǵdaıda ótti.

Qudaı kópsinbesin, Qaıyrekeńniń bes qyz, úsh uly bar. Ol Nurym, Turym esimdi balalarynyń qudalyǵynan da meni qaldyrmady. Qystygúni syrqattanyp aýrýhanada jatqanymda Dana esimdi qyzy turmysqa shyqty dep estigenmin, keıin aqsaqaldy kórgende "joly bolsyn" aıttym.

Jýyrda keshqurym syrtqa shyqsam, Qaıyrekeń eki qolyn artqa ustap, maǵan beıtanys bireýlermen sóılesip tur eken. Sálemdesip, óte bergenim sol edi, qasyndaǵylarmen asyǵys qoshtasa sala maǵan buryldy:

— Aı, inim, sál kidirshi, — dedi de qasyma taıap kep, qolyn usyndy, — alaı, bala-shaǵań aman, densaýlyǵyń jaqsy ma?

— Rahmet aǵa, qudaıǵa shúkir, eptep júrip jatyrmyz.

— Ótkende turmysqa shyqqan qyzym qashyq emes, osy qalada turady. Aldaǵy senbige shaqyryp jatyr. Úıińe arnaıy baryp aıtaıyn dep edim, óziń kezdese ketkeniń tipti jaqsy boldy, al endi soǵan birge baramyz.

— Qaıyreke, aıtqanyńyzǵa rahmet, birinshiden men kórshi ekenmin dep, qudalyǵyńyzdan qalmaı ere beremin be, úsh qudalyǵyńyzda, eki márte qudanyń aldynan óterde boldym ǵoı. Ózińizdiń de, jeńgeıdiń de týǵan-týystary bar, qala berdi menen de basqa kórshilerińiz bar degendeı, siz meni durys túsinińiz, ekinshiden Ózendegi qaınaǵamnyń mereıtoıy, shaqyryp qoıǵanyna bir aı boldy, barmaı qalsaq ókpeleıdi, — dedim shyny sol edi.

Baıqaımyn aqsaqal aǵamnyń túsi buzylyp ketti. Qaralaı qolaısyzdanǵan men:

— Aǵa, eshqandaı renish bolmasyn, jan jetse áli talaı toı da, qudalyq ta bolar-aý, — dedim.

Menen mundaı jaýapty kútpegen Qaıyrekeń alǵashynda kúmiljip qalǵanymen, birte-birte qabaǵy jazylyp, jelkesin qasydy da, kelisken syńaı tanytty:

— Árıne, árkimniń ár túrli sharýasy bar degendeı... bizge erip baratyndardyń da reti shamaly... barǵanda qudalarmen rúmki túıistiretin durys adam joq... sen sondaıǵa taptyrmaıtyn, jaqsy ediń... jáne jurtqa uqsap mas bolmaısyń...

---