InfoHub Logo

(mektep shákirti úshin jazylǵan)

Ol qazaq dalasynyń shalqar kóginde kúmbez bolyp kóterilgen edi. Aıbynyn asyrǵysy kelip, meımanasyn tasytpaq bolǵan nópir jaýǵa qas batyrdyń tilimen rýh bolyp attandap, qyran qustaı shúıildi. Ol qazaq saharasynyń ulan-baıtaq shetine án bolyp qalyqtady, kúı bolyp dombyra pernesinen tógildi, qozy qaıyrǵan balanyń sybyzǵysy bolyp sarnady, qobyz shanaǵynda muń bolyp júrekterdi jylatty. Ol taǵy da myńdardy tebirentti. Sharana sábıdiń qulaǵyna besik jyrymen ana áldıi bolyp quıyldy, boıjetken arýdyń ystyq uıasyn qımaǵan syńsý áni bolyp estildi, týǵan eline, ata-anasyna degen asyl sezimi bolyp júrek pernesiniń kóńil-kúıin shertti. Osynyń barlyǵynda da ana tilimizdiń rýhy jatty. Meniń týǵan tilimniń rýhy edi.

Meniń ana tilim. Meniń tilime qatysty sózder qulaqqa qandaı jaǵymdy estiletin edi. Osy til meniń qulaǵyma besik áldıimen endi, ata-anamnyń maǵan arnaǵan jyly sózderimen darydy. Ol mekteptegi alǵashqy ustazymnyń áýezdi únimen tálimdi tárbıe bolyp júrekke quıyldy. Ol oqý ordasyndaǵy ana tili páni muǵaliminiń qońyr daýsymen ǵylym negizi bolyp sanamdy bılep aldy. Ystyq uıadaǵy ustazdarymnyń maǵynaly sózderi arqyly ulttyq rýhymdy bıikke kóterdi, arman kókjıegine jeteledi. Ana tilim saǵynysh sezimge toly ánder arqyly bıik beleske sharyqtatty, týǵan jerimdi súıýge, ardaqtaýǵa úıretti. Sondyqtan da men ana tilime máńgi qaryzdarmyn.

Bul kúnde meniń tilim belesterge kóterildi. Qazaq memleketiniń memlekettik tili mártebesin ıelenip, elimizdiń Ánurany bolyp shet jurttar aspanynda da samǵady, alqaly jıyndarda sheshenderdiń tolǵamyna aınaldy.
Halyq rýhynyń budan da zor bıikterge kóterilýi úshin ana tilimizdiń budan da zor mártebege jetýin ishteı tiler edim. Jáne oǵan perzenttik paryzym retinde de ózimniń úlesimdi qosqym keledi.

Tarıhymnan bastalatyn ǵumyry,
Dástúrimniń, bolmysymnyń tunyǵy.
Qazaǵyma kórinetin qasterli,
Tilim meniń - táýelsizdik tuǵyry.

Qol sozdyryp edi bolashaqtan azat kún,
Endi, mine, táýelsizbin, azatpyn.
Ult rýhy jasaı berer máńgilik,
Qasıetti tili barda qazaqtyń.

Ana tilim - ardaǵym sen, baılyǵym,
Bolsyn tunyq seniń móldir aıdynyń.
Tek sen barda kórinemin bıikten,
Sen joǵalsań, halqym sheger qaıǵy-muń.

Óziń boldyń tarıhymnyń dastany,
Sen kúmbezsiń, aspanymnyń asqary.
Ana tilim - memleketimniń ojdany,
Elimdegi barlyq tildiń bastaýy.

---