InfoHub Logo

Hrıstıan ıspandar Andalýsıa memleketin qulatqannan keıin buryn sońdy bolmaǵan jabaıylyqpen bilim ortalyǵy bolǵan Andalýsıadaǵy musylmandardy joıyp jiberdi. Keıin teńdesi joq óner týyndylaryn qıratyp, sonyń ishinde asa kórnekti meshitti de qulatty. Aldymen munaralardaǵy altyn jáne ózge asyl tastardan jasalǵan shatyrlaryn, órnekterin talan-tarajǵa saldy.

İshki tóbesindegi kórkem oıýlanǵan taqtaılaryn buzdy. Edenindegi ádemi mármárlardy syndyryp, bólshektedi. Olardyń ornyna kádimgi tastardy tizip shyqty. Qabyrǵadaǵy búkil ádemi áshekeılerdi syndyryp jermen jeksen etti. Tireýishterdi (kolonalardy) qulatpaq boldy. Biraq bireýin ǵana qulata aldy. Qalǵandaryn kádimgi ákpen boıap shyqty.

Sońynda sońǵy jabaıylyq retinde 1523 jyly meshittiń ishinen bir shirkeý salýǵa sheshim qabyldady. Ol úshin sol kezde Ispanıa men Germanıanyń ımperatory 5-shi Charlstan ruqsat aldy. Bul alǵan ruqsattarymen shirkeý salý úshin taǵy qanshama tireýishterdi qulatty. Meshittiń ortasyna kres kúıinde 52h12 metr kóleminde kóriksiz bir shirkeý salyndy. Charlstyń ózi Qýrtýba (Kardova) qalasyna kelgeninde sol salynǵan shirkeýdi kórip, qatty renjip bylaı deıdi: «İstegen isterińniń jabaıylyq ekenin kórip, senderge ruqsat bergenime qatty ókindim. Álemde uqsasy tabylmaıtyn bul keremet týyndyny mundaı jaǵdaıǵa alyp keletinderińdi bilgenimde senderge ruqsat bermes edim jáne barlyǵyńdy jazalandyrar edim. Senderdiń jasaǵan bul usqynsyz shirkeýleriń jaı ǵana bir ǵımarat. Alaıda endi bul sáýletti meshittiń uqsasyn salý múmkin emes».

---