InfoHub Logo

Búginde smartfon ustamaıtyn adam joq bolar, sirá. Dese de uıaly telefon ıeleriniń barlyǵy qolyndaǵy qurylǵynyń paıdaly qyzmetterin, tańdandyratyn múmkindikterin bile bermeıdi.

Óz kezeginde Android platformasynyń 8 túrli qupıa qyzmetin usynamyz. Bizben birge bile júrińizder!

Smartfon qýatyn únemdeýdiń eń ońaı joly

Eger Android-ty qurylǵyńyzdyń negizgi betine qara ne basqa da qaralaý fon tańdasańyz, pıkselderdiń avtomatty kómeksi jaryǵy sónip qalady. Munan keıin telefon ne planshetińizdiń qýaty anaǵurlym uzaqqa jetetinin baıqaısyz. Ázirge bul fýnksıa Android-ty qurylǵylardyń barlyǵynda qamtylmaǵan. Biraq Samsung smartfondarynyń kóbinen atalǵan fýnksıany taba alasyz. Tekserip kórińiz!

Mátindi dybystaý

Eger Android-ty smartfon ıesi bolsańyz, bul maqalany oqyp qana qoımaı, tyńdaı da alasyz. Ol úshin telefon baptaýlaryndaǵy «Arnaıy múmkindikter» tarmaǵyn tańdańyp, mátindi dybystap oqý qyzmetin qosyńyz.

Smartfondy qashyqtyqtan basqarý

Mázirge kirip, «Baptaýlar ->Qaýipsizdik->Qurylǵy ákimgerlerin» tańdap, «Android-ty qashyqtyqtan basqarý» bólimine kirip, «Qurylǵylardy qashyqtyqtan izdeý» tarmaǵyn belgileńiz. Eger smartfonyńyzdy joǵaltyp alsańyz, myna saıt arqyly barlyq málimetti qalpyna keltirip, qurylǵyny buǵattaı alasyz.

«Qonaq rejımin» qosý

Telefonyńyzdy áldekimge ýaqytsha bere turý qajettigi týyndap, alaıda qurylǵy jadyndaǵy jeke málimetterińizdiń qaýipsizdigin saqtaǵyńyz kelse, «Qonaq rejımin» qoldanyńyz. Smartfon dıspleıi betinde eki saýsaǵyńyzdy tómenge syrǵytyńyz. Ekranda ashylǵan jyldam baptaýlar terezesinen joǵaryda oń jaqta turǵan qoldanýshy belgisin basyńyz. Munan soń «Qonaq qosý» qyzmeti paıda bolady. Ol arqyly ózge qoldanýshylar telefonyńyzda qandaı qyzmetterdi qoldana alatynyn tańdaı alasyz.

Ekrandaǵy lýpa

Kózi nashar kóretin adamdar Android-ty smartfondardaǵy atalǵan qyzmet túriniń ómirlerin qanshalyqty jeńildete alatynyn bile bermeıdi. «Baptaýlar-> Arnaıy múmkindikter-> Ulǵaıtýǵa arnalǵan ısharalardy» tańdańyz. Munan soń saýsaǵyńyzben nuqyp qana dıspleıdiń kez-kelgen aýmaǵyn ulǵaıta alasyz.

Modem rejımi

Túrli qurylǵylar kómegimen ınternetke qosylý úshin, mindetti túrde 3G-modem nemese basqa da qurylǵy alýdyń qajeti joq. Sizdiń smartfonyńyz modem qyzmetin usyna alady. Baptaýlar mázirine kirip, «Symsyz jelilerdi» ishindegi «Hot-spot» qyzmetin tańdańyz. Munan soń «Uıaly jedel núktesi» tarmaǵynyń janyna belgi qoıyńyz. Tamasha emes pe?

Smartfondy basyńyzdyń qımyl-qozǵalysymen basqarý

Keıde smartfondy qoldaný qajettigi týyndaǵanymen, qolymyz bos bolmaıtyn kezder bolady. Al Android platformasyn jasaýshylar bul máseleniń de sheshimin tapqan. EVA FacialMouse tegin qosymshasyn júktep alý arqyly Android-ty qurylǵyńyzdy basyńyzdyń qımyl-qozǵalysymen basqara alasyz. Qosymshany smartfonyńyzǵa júkteý jónindegi tolyq aqparatty myna siltemeden tabasyz.

Jasyryn oıyn

Google kompanıasy smartfondaǵy Android 2.3 Gingerbread platforma nusqasynan bastap qoldanýshylarǵa kishigirim syılyq ázirlegen. Ony tabý da ońaı emes. Google usynǵan jasyryn oıyndy tabý úshin «Baptaýlar» mázirine kirip, «Telefon jaıly» nemese «Planshet jaıly» tarmaǵyn tańdańyz. Ondaǵy «Android nusqasy» tramaǵyna birneshe ret jyldam basyńyz. Ekranda kishkentaı marshmelloý zefıri paıda bolǵanda, birneshe ret ústinen basyńyz. Munan keıin arnaıy oıyn ashylady. Áli oınap kórmedińiz be?

---