InfoHub Logo

Senimdilik bizge kúndelikti jaǵdaıda, bastyqtan qyzmetińizdi kóterý týraly suraǵan kezde, kólik satyp alýda, jınalysta nemese bolashaq jubaıyńyzdyń ata-anasymen kezdesken kezde asa qajet. Eger siz kúdik pen senimsizdiktiń shyrmaýynan shyǵa almaı júrgen bolsańyz, onda ózińizdi maqtan tutyp, eńseńizdi kóteretin kez keldi.

1. Eńkeıe bermeńiz

Eger siz deneńizdi tik ustap, basyńyzdy kóterip júrseńiz kózdi ashyp-jumǵansha 145%-ǵa senimdirek bolasyz.

- Áýeli shamańyz kelgenshe sozylyńyz. Sizdi bireý arqanmen tartyp jatqandaı sezinińiz.

- Jaýyrynyńyzdy múmkindiginshe tómen, joǵary tartyńyz. Eger jazý ústelinde uzaq ýaqyt eńkeıip otyrsańyz, bulaı isteý ońaı bolmaıdy. 

- Iegińizdi kóterip, tup-týra aldyńyzǵa qarańyz. Júrip kele jatyp, tómen qaramańyz: sizdiń aldyńyzda búkil álem tur.

Eger dene bitimińizben biraz másele bolsa, arqaǵa arnalǵan biraz jattyǵýlardy (mysalǵa, pýldaýn jáne kir tastarymen jattyǵýlar) jasap jiberińiz. Osylaısha siz arqańyzdyń joǵary jaǵynyń bulshyqetterin jattyqtyryp, jaýrynyńyzdy durys ustaı alasyz. Nemese, óksheńizben, jambasyńyzben jáne jelkeńizben keregege súıenińiz. Dál osylaı turyp, oǵan jaýyrynyńyzdy da tıgizińiz. Kúnde osylaı jasańyz.

Eger siz kúni boıy kresloda otyrsańyz, onda myna jattyǵýlardy jasap kórińiz: kresloǵa otyryńyz, sodan keıin arqańyzdy búkpesten ornyńyzdan turyńyz. Eger alǵa azdap bolsa da eńkeıseńiz, jattyǵýdy durys jasaı almaısyz.

Belińiz sharshaýy múmkin. Óıteni ol mundaı qalypqa úırenbegen ǵoı. Munymen de jumys isteńiz: kún ara planka (qoly jerge tirep keýdeni kóterý jattyǵýy) jasańyz (ýaqytty 2 mınýtqa deıin arttyra otyryp), sonda omyrtqańyzdy ustap turatyn bulshyqet qyrtysy tas sıaqty qatty bolady. 

Bir aı boıy eńkishtikpen kúresińiz – bul syrtqy kelbetińizdiń senimdi kórinýine úlken qadam bolary anyq. Kóp uzamaı-aq siz esh oılanbastan arqańyzdy tik ustaıtyn bolasyz.

2. Qarqynyńyzdy báseńdetińiz

Siz mazasyzdanǵan kezde, daýsyńyz ádettegiden qatty shyǵady jáne ózińiz oılaǵannan da tezirek sóıleı bastaısyz.

Al kópshiliktiń aldynda (tyńdarmanyńyz kóp bolsa da, az bolsa da) sóılegen kezde tolqysańyz, ózińiz qalaǵannan da baıaý sóıleýge tyrysyńyz. Tynys alýdy umytpańyz. Ózińizge tym baıaý sóılegen sıaqty sezilýi múmkin. Biraq, syrt kózge sózińiz qulaqqa maıdaı jaǵatyn bolady. 

3. Jymıyńyz

Qıyndyqqa nemese yńǵaısyz jaǵdaıǵa tap bolǵan kezde, ózińizdi qolǵa alý ońaı emes. Demek, júzińiz de muńaıyp turary anyq. Kóp uzamaı-aq siz týraly «ana buryshtaǵy birtúrli jigit» degen sóz aıtylady. Sondyqtan, jymıyńyz. Ótirik, qorqynyshty kúlkimen emes, shyn nıetińizben jymıyńyz. Ol úshin aınanyń aldyna turyp, kózińizdi jumyp, tómen túsirińiz. Sodan keıin kózińizdi asha otyryp, kúlimsireı bastańyz. Sizdiń naǵyz kúlkińiz osy.  

4. Kóz talastyryp oınańyz

Eger siz mysyǵyńyzben ǵana sóılesip, úıde jumys isteıtin jan bolmasańyz, onda adamdarmen kóp qarym-qatynas jasaıtynyńyz anyq. Mysaly, túski as kezinde áriptestermen, dúkendegi satýshymen, kafedegi daıashymen nemese kezdeısoq jolaýshymen.  

Sońǵy ret adamnyń kózine kózin taıdyryp áketkenshe qashan qarap edińiz? Eger siz ózińizge senimsiz bolsańyz, onda kózińizdi únemi birinshi jypylyqtatyp qoıǵan shyǵarsyz. 

Endi siz kirpik qaqpaıtyn adam bolasyz.

Ár áreketke shaǵyn kúres retinde qarańyz. Kúlip turyp, kirpik qaqpasańyz, qorqynyshty kórinbeısiz. Eger siz únemi uıalshaq bolǵan bolsańyz, onda alǵash bir-eki ret qıyn bolýy múmkin. Biraq, ony da eńserýge bolady. Áreketke kiriskenińizde, basqa adamdardyń da sizden kem mazasyzdanbaǵanyn birden túsinesiz. Al olardyń kózine uzaq qarap tursańyz, olar kózderin tez taıdyryp áketedi.

5. Qulaqshany alyp tastańyz

Syrt beıneńizdi ózgerte otyryp, siz ishki jan dúnıeńizdi de ózgertýińiz kerek. Adamdar kóbinese ózderiniń jańa adam bolǵanyna sene almaıdy. Mysaly, adam aryqtasa da ózin áli tolyq sezinip júrýi múmkin. Ózińizge ózińiz ilip qoıǵan qulaqshadan arylatyn kez keldi. Eger siz ortada ózińizdi yńǵaısyz sezinseńiz, onda basqalar da muny birden sezýi múmkin. Bárimizde kúdik bolady. Ol túısik deńgeıinde qalyptasyp, ádette bizdiń qalaǵan nársege qol jetkizýimizge kedergi keltiredi. Bar bolǵany kóp oılana bermeı, iske kirisińiz.

- Eger bireýge qyzyǵýshylyq tanytsańyz, úsh sekýnd ishinde onyń janyna baryńyz. Budan artyq oılanyp tursańyz, jaǵdaıdy uzaq saraptap, aqyry sońynda qol qýsyryp qala beresiz.

Esińizde bolsyn, eger suramasańyz, jaýaptyń bári teris bolady. Sondyqtan, aıanatyn eshnárse joq.

- Kesh kezinde tanymaıtyn adammen birden tanysyńyz. Kúdiktiń bárin keri ysyryńyz: sonda sizdi bári ózine-ózi senimdi, keremet adam dep oılaıdy.

- Aıtatyn sózińizdi nemese tanystyrýdy daıyndasańyz, birneshe saǵat boıy ýaıymdap júrmeńiz – basqa nársege nazar aýdaryńyz. Ózińizdi sarapqa salmaı, jospar boıynsha áreket etip, sabyrmen sóz sóıleńiz.

Sizdiń mindetińiz

Osy bes qadamdy oryndaý arqyly siz burynǵydan da senimdirek bola túsesiz. Osynyń arqasynda sizdiń áleýmettik qarym-qatynasyńyz tabysty bola túsedi. Bul sizdiń senimdiligińizdi arttyra túsedi. Onda siz burynǵydan da senimdi túrde qarym-qatynas jasaı alasyz. Osylaı kete beredi. Ózińizdiń senimdiligińizdi alyp qar kesegi dep oılańyz. Siz ony ıterseńiz bolǵany, ári qaraı ol ózi-aq úlkeıe beredi.

Búgingi sizdiń úı tapsyrmańyz – basyńyzdy tik kóterip, ádemi jymıyp kóshede serýendep bara jatyp kem degende bes adamnyń kózine týra qarap, jaı ǵana «sálem» deńiz. Esińizde bolsyn, olar kózderin birinshi túsirý kerek.

Áýeli ózińizdi yńǵaısyz sezinýińiz múmkin. Biraq, oǵan kimniń nesi ketedi? Báribir ol adamdardy endi kórmeısiz ǵoı. Ári qaraı tapsyrmany kúrdelendire berińiz. Mysaly, tanymaıtyn adammen áńgimelesińiz nemese kópshiliktiń aldynda sóz sóıleńiz.

Sóz sońynda aıtarymyz, úlken jaýapkershilik úlken kúshpen keledi. Batyldyq pen ózine-ózi senýdiń arasynda názik shekara bar. Sondyqtan, artyq ketpeńiz. Ózińizdi ózgertińiz, biraq ózgermeńiz.

---