InfoHub Logo

Bir joly Qojanasyrdyń baǵyna úsh ury túsipti. Baq ishindegi tasyr-tusyrdy estigen Qoja:

— Qatyn-eı, sham jaq, baqqa túsken kimder eken qaraıyq! — deıdi. Qojaıyndardy kórgen urylar tura qashpaqshy bolǵanymen kózge túsip qalady. Urylardyń bireýi tez arada bir aǵashqa jabysady da, demin ishke tartyp, únsiz turyp qalady. Ekinshisi shirigen japyraqtardyń arasyna jasyrynady. Úshinshisi jol ústine sulap túsedi.

Ápendi aǵashqa jabysyp turǵan uryǵa baryp:

— Sen kimsiń, meniń baǵymda ne istep júrsiń? — deıdi. Ún joq. Ekinshi ret suraıdy. Ury baıǵustyń qoryqqannan tili tańdaıyna jabysyp, a dep aýzyn ashýǵa shamasy kelmeıdi. Qoja úshinshi ret suraıdy shaqyrylmaǵan qonaqtan «netken jansyń?» dep. Aqyry esin jıǵan ury:

— Men aǵash ulýymyn, — deıdi.

— Mundaı rabaısyz zor ulýdy birinshi ret kórip turmyn, —  dep kúledi Ápendi.

— Bıyl jaýyn-shashyn mol bolyp, sodan soraıyp ósip kettim, — dep túsindiredi ury.

Qoja basyn shaıqap, shirigen japyraqtardyń arasynda júresinen otyrǵan uryǵa keledi.

— Al sen kimsiń, meniń baǵymda neǵyp júrsiń? — deıdi Qoja.

Ún joq. Ekinshi márte suraıdy. Ury jumǵan aýzyn ashpaıdy. Úshinshi márte Qoja suraǵyn qattyraq aıtady. Manaǵy dan da kúlkili jaýap estıdi.

— Men ýly sańyraýqulaqpyn...

— Oı, qatyn-aı! — dep ishek-silesi qatady Ápendiniń. — Myna zor sańyraýqulaqty qarashy!

— Men qara shirik bar jerde ósemin, mine, sonda soraıyp ósip kettim.

Qoja «sańyraýqulaq» jaqqa túkire bergende, jol ústinde sulap jatqan taǵy bireýdi kóredi. Ol taǵy da úsh márte munyń kim ekenin suraıdy. Úshinshi márte suraǵanda ǵana jaýabyn estıdi.

— Men ólikpin, — deıdi ury.

— Ólikter sóıleı almaıdy ǵoı, — degende, ury:

— Ózderiniń ólik ekenin umytqan kezde sóıleı bastaıdy! —  deıdi ol. Molda bul sózderge ishek-silesi qatqansha kúledi, tipti sham da sónip qalady. Sham sóngenin paıdalanyp úsh ury sharbaqtan sekirip tura qashady.

— Eı, qatyn, júr uıyqtaıyq, baqqa eshqandaı ury túspepti ǵoı, — depti sonda Ápendi.

---