InfoHub Logo

Búgin Nazarbaev ortalyǵynda QR Tuńǵysh Prezıdenti — Elbasy qorynyń «El úmiti» jobasynyń belsendi qatysýshylary - respýblıkalyq jáne halyqaralyq olımpıadalardyń jeńimpazdaryna qurmet kórsetildi.

«El úmiti» — Qazaqstannyń Tuńǵysh Prezıdenti Nursultan Nazarbaevtyń bastamasymen qolǵa alynǵan qordyń jańa jobasy. Joba elimizdiń daryndy balalary men jastaryn izdep-taýyp, olardy qoldap, ǵylymı jáne shyǵarmashylyq belsendiligin yntalandyrýǵa baǵyttalǵan.

«El maqtanyshy» syılyǵy atalǵan keshendi jobany júzege asyrýdaǵy aýqymdy jumystyń biri bolyp tabylady. Elimizdiń ár óńirinen matematıka, fızıka, ınformatıka, bıologıa, lıngvısıka, hımıa pánderi boıynsha joǵary nátıjege qol jetkizgen jas daryndar jáne olardyń tálimgerleri men ustazdary búgin atalǵan syılyqtyń laýreaty atandy», delingen habarlamada.

Halyqaralyq dárejedegi olımpıadalardan altyn, kúmis jáne qola medal alǵan oqýshylarǵa Elbasy qorynyń atynan dıplomdar men aqshalaı sertıfıkattar tabystaldy.

«Keshe Qazaqstannyń Tuńǵysh Prezıdenti Nursultan Nazarbaevtyń qolynan altyn medal ıegeri — Respýblıkalyq fızıka-matematıka mektebiniń túlegi (Almaty q.), halyqaralyq aqparattyq tehnologıalar ýnıversıtetiniń stýdenti Batyr Sardarbekov pen onyń tálimgeri — Qazaqstandyq ulttyq ınformatıka komandasynyń jattyqtyrýshysy Temirlan Satylhanov 2 mıllıon teńge kólemindegi sertıfıkat aldy», delingen habarlamada.

Kúmis syılyqqa árqaısysy 1 mıllıon teńgeden, qola medal úshin 500 myń teńgeden sertıfıkattar berildi.

Bul medaldardyń ıegerlerine sertıfıkattardy Qazaqstan Respýblıkasy Tuńǵysh Prezıdenti — Elbasy qorynyń atqarýshy dırektory Áset Isekeshev tabystady.

«Qazir tereń bilim alyp, halyqaralyq jarystarǵa qatysýǵa tamasha múmkindikter óte kóp. Mundaı múmkindikterdi paıdalaný qajet. Osy rette Elbasy qory «El Úmiti» bastamasy aıasynda jas talanttardy qoldaıdy, jastardy yntalandyrady jáne jańa bıikterdi baǵyndyrýǵa kómektesedi», — dedi Áset Isekeshev.

Qordyń atqarýshy dırektory jas talanttardy munymen toqtap qalmaýǵa, bilimge umtylyp, jańa jetistikterge jetýge shaqyrdy. Ol stýdentterdiń búgingi jetistigi — Qazaqstannyń tabysty bolashaǵynyń kepili ekenin atap ótti.

---