Bir adam kóp jasady jer betinde,
Mekendep jaqsy jaıdy el shetinde.
Zorlyqshyl, aram oıly, ury boldy,
Quralǵan aramdyqtan dáýleti de.
Nashardy zar jylatqan jalǵyzyn jep,
Tirlikte oılamaǵan «ólemin» dep.
Jalǵandy jalpaǵynan basyp ótti,
«Jazǵanyn kórge bara kóremin» dep.
Sol sorly aýyryp jatyr óleıin dep,
Qımaıtyn amanatyn bereıin dep.
Taýysyp ap jeldeı esken az ómirdi,
Qoınyna sýyq kórdiń eneıin dep.
Óldi ol mezgilinde ajal jetti,
Ólsheýli dúnıeden demi bitti.
Oranyp úsh qary bóz basqa túk joq,
Saqtanbaı tirliginde kórge ketti.
Jatty ol qarańǵyda záresi ushyp,
Tirlikte molda aıtqany eske túsip,
Deıtuǵyn: «ımansyzǵa perishteler
Kórseter kór azabyn tándi qysyp».
Qozǵalyp, shamasy joq turatyndaı,
Sozyldy qarańǵylyq tań atyrmaı.
«Qaıda júr perishtesi suraıtuǵyn,
Keshikti-aý, bular qaıda, dep japyrmaı?»
Sonymen áldeneshe jyldar ótti,
Tán shirip, topyraq bop, tozyp bitti.
Shybyn jan aınalsoqtap, sasyq kórde
«Perishte keledi» dep, bosqa kútti.
Al endi molda qaıda, sózi qaıda,
Beretin ujmaq, dozaq anaý jaıda?
Bilmeımin anyǵyn da, tanyǵyn da
Bas qatty sheshemin dep, joqty oıda.

---