InfoHub Logo

Aqbaıdyń Áýbákiri Qurmanǵazynyń tory aty jóninde habar estıdi. Torynyń qunan kúninde-aq báıge bermegenin jetkizýshiler úlkeıtińkirep ańyzǵa aınaldyrady. Ózimshil Áýbákir: «jalań aıaq Qurmanǵazyǵa ondaı at qaıdan bitti deısiń, bireýden urlap alǵan shyǵar, baryp tartyp alyp kelińder, izdep kelse, kóresini kórsetermiz ol qaraqshyǵa», — dep eki kisi jiberedi. Qurmanǵazy ekeýin eki uryp attan túsirip, bosqa aram ter bolyp starshynnyń soıylyn soǵyp júrgenderiniń uıat ekenin betine basyp: «Kórgen-bilgenderińdi Áýbákirge aıta baryńdar», — dep qoıa beredi. Qurmanǵazy Áýbákirdiń ózine óshtesip qalǵanyn, onyń taǵy da sońynan jaryq alyp túsetinin biledi. Dos-jarandaryn shaqyryp alyp, starshynnyń myna sheksiz zorlyǵyn áshkereleı, masqaralaı shyǵarǵan jańa kúıin taratady. Kúıdiń basynda biraz qaıǵyly hálder sýretteledi. Ol qaıǵy tereńdep keńeıip, yza-ashý notalaryna aınalady. Kenet Qurmanǵazyǵa tán taǵy kún japqan bulttyń ydyraǵanyndaı jasyq dybystar qala turyp, kúı kóńildenip, shyrqap, dombyranyń saǵasyna qaraı syrylyp, attyń dúrsili estilgendeı tyńdaýshyǵa qulaq túrgizedi. Osy bir kúsh, qajyr sýretti qaıtalap taǵy kúsheıedi. «Úmitsiz saıtan isi» degendeı aldan jaqsylyq kúnin kútkendeı jaımashýaqtanady da, taǵy kenet aýyr oı, tereń qaıǵyǵa kóshedi. Bul aýyr jaǵdaı da uzaqqa sozylady. Dombyranyń saǵasyna baryp biraz «muńyn halqyna shaqqandaı» taqyryp perneler arqyly ótip, sol keıip, sol úninde jaılap, asyqpaı keıin qaıtady. Bastaǵy aýyr jaıdy
sýretteıtin shyrqaǵan, zarlaǵan taqyryp qaıta bir kórinip, kúı aıaqtalady. Jınalǵan jurt kóp ýaqytqa sheıin tomsaryp otyryp qalady. Birazdan keıin bastaryn kóterip, kúıdiń asa tereń mazmundylyǵyn áńgime etedi. Kúıshiniń anasy Alqa turyp: «munyń aty—bizge kún kórsetpeı qoıǵan Áýbákirdiń ákesi Aqbaıdyń atymen atalsyn. Seniń ákeńniń kóp jyldar boıy bermegen aqysy úshin, seni talaı jábirlegeni úshin, halqyńa Aqbaıdyń aram atyn áıgileý úshin dombyradan ǵana óshińdi alarsyń» deıdi. Jınalǵan jurt bir aýyzdan kúıdiń atyn «Aqbaı» qoıalyq deıdi.

---