InfoHub Logo

1850 jyldardyń basynda Qurmanǵazy kúı arqyly qoshtasyp (Aman bol, sheshem, aman bol), taǵy da Jaıyq ózeniniń sol jaq betine qaraı ketedi. (bireýlerdiń aıtýynsha, Qurmanǵazy ıgiliktiń qyzy Áýesti alyp kelip, aýylda az bolyp, úı ishin Jálel deıtin jamaǵaıynǵa tapsyryp ketedi). Ol Jem ózeniniń boıyndaǵy Tóremurat, Narynbaı, Óten degen batyrlarǵa barǵysy keledi. Olar etjaqyn bolmaǵanymen Qurmanǵazynyń úlken ákesiniń naǵashylarynyń rýynan shyqqan bolady eken. Birneshe kún júrip, Jaıyqtan, Jemnen aman-esen ótip Tóremurat, Narynbaı aýylyna keledi. Batyrlar úıde joq, basqa bir aýylda jıyn bolyp, soǵan ketken bolyp shyǵady. Qurmanǵazy batyrlar ketken aýyldyń shamasyn surap bilip, onsha alys emes degesin solaı qaraı kete beredi de, álgi aýyldy taýyp keledi. Batyrlar ózderine arnalyp tigilgen úıde eken. Attaryn beldeýden túıip tastapty. Naızalaryn úıge súıep qoıypty. Qurmanǵazy kóp naızanyń birin alyp, jerge
shanshyp, soǵan atyn baılaı sala úıge kiredi. Kúıshiniń bergen sálemin eshkim eleń qylmaıdy. Úı ishindegiler bir áńgimeniń qyzý jerinde otyrsa kerek. Álden ýaqytta Narynbaıdyń kózi esik jaqta áli kúnge túregelip turǵan Qurmanǵazyǵa túsip ketip: «Ýa, jigit, qaıdan júrsiń? Tórge shyq!» — deıdi. Qurmanǵazynyń shóldep, tútigip erni kezerip turǵanyn kórip, saptaıaqtan qymyz quıdyryp beredi. Qurmanǵazy bir zere qymyzdy kóterip tastap, tamaǵyn kenep, dombyrasyn taqpaqtap, ózin óleńmen tanystyra sóz bastaıdy:

«Naryn edi jaılaýym,
Qıqý salǵan qusy bar.
Qamysy qalyń kólderim—
Bári qaldy artymda.
Bala jastan bir júrip,
Asyq oınap alysqan,
Qatar ósken teńderim.
Qaıran týǵan topyraq,
Barlyǵynan ýaz keship,
Mańdaıǵa túsken táýelmen,
Tóremurat, Narynbaı,
İzdep kelgen erlerim!» — deı bergende, Tóremurat: «Sóziń jaqsy eken, arǵy jaǵyn aıtpaı-aq qoı, tanysa jatarmyz, izdep kelseń, ini bol!» — dep Qurmanǵazynyń sózin toqtatyp, shaqyryp qasyna otyrǵyzady. Sol kezde osy kúıdi shyǵarǵan eken.

---