InfoHub Logo

Eliniń sorpaǵa shyǵary atanǵan qyńyr minezdi Balǵabaı bolys alty qatyn alyp, biraq solardyń birde-birinen bala súımepti. Qazany maıly, tósegi jaıly, tórt túligi saıly Topaı baı alpysty alqymdaǵanyna qaramaı, at sabyltyp qalyndyq izdeı bastaıdy. «El qulaǵy elý» degendeı, jasynan ánshi atanǵan Balkúmistiń dańqyn estigen baı oǵan kóz salady.

Qyz aýylyn mańaılap, úı tiktirip, aq dastarhan jaıyp tastaıdy da:

— Aq dıdaryn kórsetip, ásem ánin estirtsin, — dep baı bir jigitti Balkúmiske jiberedi. Qurby qyzdaryn ertip tabaldyryqtan attaı bergen Balkúmisti Balǵabaı qarsy alyp:

— Balkúmis, izdep keldim seni alystan,
Qyrandaı uıasyna qonǵan-ushqan.
Jasatam kúmis oshaq, altyn kese,
Jar bolsań jaqsylyqqa qol alysqan, —

dep bir serigine shyǵartyp jattap alǵan óleńin aıtyp, ańyrap qoıa beredi.

— Jaıylǵan dúıim elge ataǵyń bar,
Qaltań toq, ústinde asyl shapanyń bar.
Tabylar ón boıyńnan bir ǵana min —
Ieginde qarsy tutam saqalyń bar.
Ne kerek kúmis oshaq, altyn kese,
Tilegin jas júrektiń ótemese,
Aıtshy ata, on jetińde qaıter ediń,
Kempirge alpystaǵy nekelese, —

dep toqtaıdy da, úıden shyǵa jóneledi.

---