InfoHub Logo

Tóremurat, Narynbaı aýylynda júrip kıik atýǵa shyqqanda úshinshi kıikke oqtalarda Qurmanǵazy: «Kıiktiń qaı jerinen tıgizeıin?» — dep surapty deıdi. Sonda batyrdyń joldastarynyń bireýi osy tıgize qoıar deımisiń degendeı: «Aıaǵynan» deı salypty. Sonda Qurmanǵazy kıiktiń artqy aıaǵynan tıgizip, kıik úsh aıaqtap aqsańdap, qasha jónelse kerek. Qojańdap «qýamyn» degen jigitterge Qurmanǵazy ulyqsat etpeıdi. Ózi dombyrasyn alyp sol arada bir kúı shertedi. Qurmanǵazynyń syryna ábden qanǵan Tóremurat kúıshiniń qasyna eshkimdi jibermeı, ábden dombyrasyn aıaqtap bolǵanda ǵana ózi baryp: «Jıenjan, bul arada taǵy bir nárse týyp qaldy bilem, atyn qoıdyń ba?» — dep suraıdy. Sonda
Qurmanǵazy biraz kidirip, qýanǵan emes, kúıingendeı kelbetpen:

— Naǵashyeke, jaralynyń bári jaraly, jannyń bári birdeı, ómir úshin kúreste kimge oq darymaıdy? Bizdiń tusymyzda jaraly jan jalǵyz kıik pe? Atpaıyn-aq dep edim, sizdiń myna bir jigitterińizdiń qyzdyrma sózimen attym. Anaý aqsap ketken kıikteı jaralylarǵa arnadym bul kúıimdi. Aty — «Aqsaq kıik» depti deıdi.

 

---