InfoHub Logo

Jazǵy jasyl jaılaýdyń kóz qurtyn tartar sániniń biri — kól jaǵalaı, ózendi boılaı júretin, jaılaý tósin dýmanǵa bólegen qaz bolsa kerek. Aq qanat balapandaryn artynan ertip, ózine tán únimen ómir ánin shyrqaǵan bir top qazǵa at minip, el qydyrýdan basqa sharýasy joq mergensymaq jigittiń kózi túsedi. Ol beıǵam júrgen qazdyń shyrqyn buzyp, shyrapatyn shyǵarýdy ermek sanaıdy, erlik kóredi. Qazdy atyp oljalaýdy armandaǵan jigit, bir kúni myltyǵyn alady da, kól jaǵalaı biri ushyp, biri qonyp óz qyzyǵyna masattanyp júrgen qazdarǵa bet túzeıdi. Qamys jıegin panalaı kelgen mergensymaq qazǵa oǵym darıdy-aý degen mejeli jerge toqtaıdy da, bir top balapanyn artynan ertken ene qazdy qaraýylǵa alady. Balapandarynyń táı-táı júrisin qyzyqtap turǵan qazdyń turysy jigit degbirin qozdyrady. Myltyq daýsy tars ete túsedi de, oıynda qýanyshtan basqa eshteme joq ene qaz qanatyn qaǵyp-qaǵyp jiberip, usharǵa dármeni joq ekenin bilgennen keıin kólge túsip júze jóneledi. Jańa ǵana qanatyn qomdap júrgen balapandar shýlaı ushyp aralǵa ótip ketedi. Ene qaz da aralǵa ilinedi. Qazdy qanjyǵasyna baılamasa da, oǵy tıgenine masattanǵan jigit atyna minip, aýylǵa tartady. Balapandaryn ertip araldy mekendegen, usharǵa dármeni joq aqsaq qaz ýaıymmen solady. Kún artyna kún kelip, kúz bolady. Qus qaıtady. Barlyq qus sándi sap quryp, án marjanyn tógiltip, ońtústikke bet alǵanda, beıshara bolǵan aqsaq qaz ǵana muń men zaryn tógip úıirinen aıyrylyp aralda qala beredi. Kúıshi aqsaq qazdyń osy muńyn kúıge qosqan eken deıdi.

---