InfoHub Logo

(İ nusqa)

Joshy hannyń ashamaıǵa mingizgen jas balasy ańshylarmen birge júrip, bir jerde qashyp kele jatqan aqsaq qulandy qýyp ketipti. Aqsaq qulan josyp júıtkip bara jatqan bir top qulanǵa qosylypty. Balanyń astyndaǵy erikken tulpar eligip, quıryǵyn shanshyp quıǵytyp qulandarǵa qosylady. Qulannyń áńgisi balany shaınap óltirip ketedi. Ańshylar balany izdep taba almaıdy. Joshy ańshylarǵa qaharyn tógip: «balamdy taýyp ber!» dep, qalyń kisige izdetedi.

«Balamdy «óldi» dep estirtken adamnyń qulaǵyna qorǵasyn quıamyn!» — dep jarlyq qylady. Ańshylar bir jerde balanyń julmalanǵan qolyn tabady. Endi eshkim balasynyń ólgenin Joshy hanǵa batyp aıta almaıdy. Aqyry kópshilik ordada otyryp, bir kúıshige jyrmen aıtqyzady. Sondaǵy jyrdyń uzyn-yrǵasy mynaý eken:

Ýa, ıemiz, Joshy han,
Dombyra ne dep jyrlaıdy?
Sarnap bir daýsyn qyrnaıdy,
Qulaǵyń sal osyǵan.
Aqsaq qulan, qý qulan,
Qıannan qashqan tý qulan.
Qıyrsyz qula dalada
Ańda júrgen balaǵa
Kez bolyp bir qashypty,
Belden-belge asypty.
Aqsaq qulan, Joshy han!..
Elsiz quba dalada,
Qat-qat budyr salada,
Mekendep órgen, órbisip,
Ordaly qulan josyǵan.
Qýyp aqsaq qulandy,
Erikken tulpar qunandy,
Ordaly úrikken qulanǵa
Quıǵytyp oınap qosylǵan.
Ólim degen Táńir isi,
Jelikken qulan áńgisi.
Qulan men tulpar erikken,
Josyǵan qulan jelikken.
Balańdy shaınap óltirip,
Julmalap jalmap ketipti
Ordaly qulan shoshynǵan.
Sózdi aıtyp jyrlap zarlaǵan
Dombyranyń balańdy
Estirtkeni osy, han!
Ózgege artpa jalańdy,
Eliktirgen balańdy,
Sol qý qulan, tý qulan.
Aqsaq qulan, Joshy han,
Ilan, hanym, osyǵan!

---