InfoHub Logo

Ertede halqyna qaıyrymdy bir han bolypty. Halqyna qaıyrymdy bolǵan soń, hanǵa tóńiregindegiler de qurmetpen qaraıdy eken.

Hannyń bar úmit-tilegindeı jalǵyz uly bolsa kerek. Sol jalǵyz uly endi eseıip, at jalyn tartyp mine bastaǵan shaǵynda qaıtys bolady. Jalǵyz uldyń mezgilsiz qazasy handy qatty qaıǵyǵa batyryp, kóz jasy kókiregin jýady. Aqyly qumdaı shashylyp, qasiret shekken handy jubatý úshin aıaq jeter jerden nebir el bastaǵan kósem, sóz bastaǵan sheshen kelip, kóńil aıtady. Qaıǵyny aqylǵa jeńdirýin ótinip, sabyrǵa shaqyrady. Biraq han qaıǵydan ezilip, tirideı solyp, basyn kótermeı jatyp alady.

Sol kezde, el ishinde jurttan asqan bir sybyzǵyshy bolady eken. Hannyń basyndaǵy azaly haldi estip, arnaıy ordaǵa keledi. El bolyp ıilip, jurt bolyp jıylyp, hannyń qaıǵysyna ortaqtasyp jatqanda men de shet qalmaıyn dep oılaıdy. Sóıtip, hanǵa kelip, sálem berip, basý sóz aıtady. Han sol qalpy, sálemge jaýap qatpastan, ishteı mújilip, ózimen-ózi bolyp, meńireıip jatyp alady. Sybyzǵyshy sáleminiń
ótpegenin kóńiline almaıdy. Tómendeý jaıǵasyp otyrady da, qutysynan sybyzǵysyn shyǵaryp, asyqpaı sarnata jóneledi. Buryn-sońdy tartylmaǵan tyń saryn estir qulaqty eleńdetip, ǵajaıyp sazymen baýraı jóneledi.

Sybyzǵy úni uzaq sarnap, ýildeı óksip, ýhileı kúrsinip, sher-shemenniń bárin dybysqa aınaldyryp jibergendeı bozdap kelip toqtaıdy. Sonda han tósekten basyn kóterip, sybyzǵyshymen amandasyp, joǵary shyǵyp otyrýyn ótinip edi deıdi.

Sybyzǵyshy tórge shyǵyp jaıǵasqanda, hannyń qas-qabaǵyn baǵyp júrgender kúıshiniń ıyǵyna shapan jabady.

Mine, hannyń qaıǵysyn serpip, basyn kótertken osynaý kúı el ishinde «Han jubatý» bolyp taraǵan eken.

---