InfoHub Logo

Taraǵaıdyń ortanshy áıeli Tákıná qatyn osy Temirge ekiqabat bolǵan kezinde tús kóredi. Túsinde Qyzyr ǵalı ássalam áýlıeden bala suraıdy. Áýlıe oǵan denesi tastan, júregi dúnıeniń eń názik gúlderinen jaralǵan ul beredi. Emshegin jóndep eme almaǵan balasyn anasy quıryǵynan salyp qalǵanda, tastan jaralǵan balanyń denesinen qoly qatty aýyryp ketip, anasy jylap qoıa beredi. Anasynyń jylaǵanyn kórip, júregi názik gúlderden jaralǵan balasy endi qosylyp jylaıdy. Anasy men balasynyń kózinen jasy aǵyl-tegil tógiledi. «Qalaı, balań unaıdy ma?» — degen Qyzyr ǵalı ássalam áýlıege Tákıná qatyn: «Maǵan mundaı jylaýyq balanyń keregi joq, basqa bala ber», — dep jalynady. Sonda áýlıe oǵan kerisinshe denesi gúldeı jumsaq, júregi tastaı basqa bala beredi. Bul da anasynyń emshegin durystap eme almaıdy. Anasy buny da urady. Biraq qansha ursa da, balanyń kózinen jas shyqpaıdy. Balasynyń bul minezine qýanǵan anasy sylqyldap kúlip jatyp oıanyp ketedi. Erteńine Tákıná qatyn túsin bir bilgir kári kempirge jorytady. «Túsińde jylasań, óńińde qýanarsyń, al túsińde qýansań, óńińde jylarsyń. Beker alǵashqy balaǵa kónbegen ekensiń. Seniń myna týǵaly turǵan balańnyń denesi et pen súıekten bitken jumsaq bolǵanmen, júregi tastan da qatty keledi eken, túbi ózgeni qoıǵanda ózińdi de talaı jylatar», — degen eken.

---