InfoHub Logo

Aqtaýlyq pedagog Londonda ótken halyqaralyq jarysta top jardy. Oksford qalasynda ótken baıqaýda qazaqstandyq ustaz 100-den asa memleketten kelgen muǵalimder arasynan úzdik shyqty.

Osylaısha, ol Anglıaǵa magıstratýraǵa oqýǵa grant utyp alǵan. Alaıda, ustazdyq qyzmetin tastamaı, elge qaıtyp keldi.

Talapty. Talantty. Ozyq oıly jas maman. Áriptesteri Jiger Teleýhanovty osylaı baǵalaıdy. 25 jastaǵy pedagog álemniń úzdik hımıa pániniń muǵalimi atandy. Baıqaý Oksford qalasynda ótken. 1 apta boıy oqýshylarǵa qandaı taqyrypta tárbıe saǵatyn ótkizý kerek, qandaı jobalar jasaý qajet, sol sıaqty pánder boıynsha túrli metodologıa boıynsha biliktilikterin synaǵan. Úzdik shyqty. Grant utty. Alaıda, ol elge qyzmet etýdi jón kórgen.

«Ózimizdiń boryshymyz bir. Álıhan Bókeıhanov, Ahmet Baıtursynov, Abaı Qunanbaev atamyz sıaqty zıalylarymyz óz zamanynda ózderiniń jastaryna bilimin ashý kerek dep ósıet etken. Dál solardyń jolyn qýatyn qarapaıym qazaqtyń balasymyz», - deıdi Jiger Teleýhanov.

Jiger Teleýhanov bilim ınovasıa mektebiniń túlegi. 7 tilde erkin sóıleıdi. Aqtaýǵa kelgenine 4 aı bolǵan. Osyǵan deıin Qazaq ulttyq ýnıversıtetin támamdap, bilimin Anglıada, Fransıada jalǵastyrǵan. Alǵan bilimin aqtaýlyq oqýshylardyń bilimine jumsaýda. Budan bólek, óz bilgenin bilim ınovasıa mektebiniń ustazdaryna úıretýde.

«Sol jaqtaǵy úırengen nárselerin, metodıka, qandaı kitaptardy úırený kerek, muǵalimderdi ózin-ózi jetildirý, praktıkada úırený kerek sıaqty semınar ótkizdi. 5-6 ret ótti, aptanyń bir kúnderin belgiledik. Pedagogıkalyq quram qatysyp jatyr. Maqsat aıqyn. Myna kitapty oqysańyz, osy daǵdyńyz artady degen sıaqty», - deıdi Bilim ınovasıa lıseıiniń dırektory Abaıbek Sársenbekov.

Jiger qazir oqýshylaryn hımıa páninen Respýblıkalyq olımpıadaǵa daıyndaý ústinde. Olardyń altyn alatynyna senimdi. 400-ge jýyq bala bilim alatyn bilim ınovasıa mektebiniń 25 oqýshysy óńir namysyn qorǵaýǵa joldama alǵan.

---