InfoHub Logo

Balqash boıyndaǵy aýyldardy aralap qaıtý maqsatynda eki bı (Balpyq bı men Eskeldi bı) saparǵa shyǵady. Qaratal ózenin jaǵalap, jol boıy ázildesip kele jatsa, moınynda tumary, kekil júnine bir shoq úki baılaǵan ádemi aq taılaq oınaq salyp, jolaýshylardyń aldynan shyǵady da, lezde ǵaıyp bolady. Jolaýshylar onyń ketken jaǵyna qarasa, alty qanatty aq úı men tórt qanatty aq otaý kórinedi. Úılerdiń mańaıynda on bes, on altylar shamasyndaǵy aq jelekti áıel bala kózge shalynady. Qos bı ony elemeıdi. Bapekeń Eskeldige qarap, ıá ázil, ıá shyn:

— Men jańaǵy taılaqty attym, — deıdi.

— Sen atsań, men ony jazamyn, — deıdi Esekeń de ázil-shynyn bildirmeı.

Ekeýi ázil-qaljyńmen áýdem jer júrip, arttaryna qarasa, «atashy, ata!» dep bireý júgirip kele jatyr deıdi. Ekeýi de aıap ketip, attarynyń bastaryn tejeıdi. Baıqasa jańaǵy joldaǵy áıel bala.

— Árýaqtaryńnan aınalaıyn, atalar. Bizdiń úı, mine, tıip tur. Ózderińiz at basyn burar dep ádep saqtap edim, ótip bara jatyrsyzdar. Úıge túsip, sýsyndap shyǵyńyzdar, — deıdi qıylyp.

Qazaq qashanda áıel balany qatty qurmettegen emes pe, tilegin oryndy kórip, úıge kelse, álgindegi aq taılaqtyń ishi keýip ketken. Áreń tynystap, ólgeli jatsa kerek.

Bapekeń úıge kirgende Esekeń tysta qala berip, oń aıaǵymen aq taılaqtyń ishin basyp, qolyndaǵy qamshysymen úsh dúrkin tartyp jiberipti. Artynsha úıge kirip, Bapekeńmen birge shaı iship, qymyz simirip, sýsyndap, birge attanady. Biraq ózderiniń kim ekenderin aıtyp, qaıtar joldarynda qonatyndyqtaryn bildiredi. Bular attaryna qonysymen, aq taılaq qaıtadan oınaqtap shyǵa kelipti.

---