InfoHub Logo

Aqtóbe qalasynyń Qarǵaly aýylyndaǵy №53 orta mekteptiń muǵalimin orys tilinde durys sóılemegeni úshin jumystan shyǵaryp jibergen dep habarlaıdy kerek-info tilshisi.

Bes jyldyq tájirıbesi bar mamannyń bilimine ata-analar kúdik keltirdi. Olarǵa mektepaldy daıyndyq klasyna jetekshilikke barǵan muǵalimniń orysshasy unamaı,  jaqynda ǵana jumysqa turǵan bastaýysh synyp muǵalimin jumystan shyǵarýdy talap etken.

Bul jaǵdaıdy mektep dırektory Jánıa Romanova túsindirip berip, muǵalim jumystan óz erkimen ketkenin aıtty.

"Biz – aralas mekteppiz. Orys klastaryna sabaq beretin maman óte tapshy. Eki mektepaldy daıyndyq klasyna muǵalim joq. Muǵalim buryn bes jyl orys mektepterinde, balabaqshalarda jumys jasaǵan. Eńbek kitapshasynda bári jazýly tur. Meniń aldyma kelgende de orys tilinde erkin sóılep turdy. Tájirıbesi bar muǵalim bolǵan soń qyzmetke aldyq. Úsh aılyq synaq merzimimen óz jumysyna kirisken bolatyn. Bul topty 14 qyrkúıekke deıin joǵary dárejeli muǵalim Valentına Petrova oqytqan edi. Jas maman kelgen soń, daıyndyq synybyn osy muǵalimge tapsyrdyq. Mektepaldy daıyndyq klasyndaǵy bir oqýshynyń ata-anasy mektep ákimshiligine eskertpesten muǵalimniń sabaǵyna kirgen. Sonda muǵalimniń sabaq berý ádisi unamaǵan bolý kerek, keıin 12 ata-ana qol qoıǵan aryz-shaǵym aldym. Meniń oıymsha, ata-analar buǵan deıin sabaq bergen muǵalimdi qaıtaryp alǵylary kelgen sıaqty. Óıtkeni, ol kóp jylǵy tájirıbesi bar, joǵary kategorıaly maman. Biraq, bizge kelgen jas mamandy biz oqytyp, úıretýge mindettimiz. Jańa oqý jyly bastalmaı jatyp, ata-analar tarapynan osyndaı jaýap alǵan muǵalim óz erkimen jumystan ketti,- dedi ol.

Jańadan kelgen jas mamannyń biliktiligine kúmán keltirgen ata-analardyń biri Aıjan bylaı deıdi:

- Jas muǵalimniń jeke basynda jumysym joq. Biraq, ol orys tilinde múldem bilim bere almaıdy. Qazaqsha oılap, ony orys tiline aýdaryp jetkizedi. Balalarǵa teris bilim beretin muǵalim kerek emes. Balamyz úıge kelgen soń sózderdi qate aıtady. Oryssha aksentpen sóıleıdi.

№53 orta mekteptiń mektepaldy daıyndyq klasynda 22 oqýshy oqıdy. Osy klastyń taǵy bir ata-anasy Sáýle Qulsarınanyń aıtýynsha, osy oqıǵadan keıin synyp eki topqa bólingen.

"Nege qarsy bolyp jatqanyn túsinbeımin? Óte bilimdi, sypaıy, sabyrly qyz edi. Balalarymyzdy shyǵaryp salyp, kútip alatyn. Qashan da balalarmen birge júretin. Aıtqan áńgimeleri de, sóz saptaýlary óte oryndy muǵalim edi. Mysaly, meniń balam balabaqshaǵa qansha jyl barsa da, úırenise almady. Al mektepke tez sińisip ketti. Onyń ózi muǵalimniń balamen óte jaqsy jumys jasaıtynyn bildirýi kerek. Qazir ata-analar eki topqa bólindi, bireýleri jaqtaıdy, bireýleri dattaıdy. Men mundaıdy túsine almaımyn, muǵalim ata-anaǵa emes, bastysy oqýshyǵa unaý kerek. Al jas muǵalim oqýshylarǵa unaıtyn",- deıdi ol.

Atap aıtý kerek, №53 orta mektepte  birinshi synyptardan beseý. Olardyń 4-ýi orys tilinde oqıdy.

---