InfoHub Logo

Aqmola-Qarataly temir joly salyna bastaǵanda aýyl jigiti Arbabaı ózi suranyp qurylys jumysyna kiredi. Qarýly jigit qulashtap qaıla siltep, omyra kúrek batyryp qara jerdiń qyrtysyn aıyrady. Jol qurlysynyń basshylary ony únemi maqtap júredi.

Jol salynyp bitken soń adal da qarýly jigitti ýystarynan shyǵarǵysy kelmegen basshylar oǵan jol qaraýshy bolyp qalýdy usynady. Aýyl jigiti kelisimin beredi. Sodan ony bir apta boıy jol qaraýshysynyń mindetin atqarýǵa úıretedi. Jol qaraýshysynyń shartty belgileri bolyp esepteletin úsh tústi jalaýshalardy qandaı jaǵdaıda qalaı paıdalaný kerektigin aıtady.

— Óziń qaraıtyn ýchastokten kezdeısoq joldyń búlingenin kórseń jáne sol kezde poezd kele jatsa, — deıdi muny úıretip júrgen nusqaýshy, — qorjynyńnan qyzyl jalaýsha ny kótere ustap jol boıynda tura qalasyń. Bul seniń poezd júrgizýshi mashınıstke, aıtaıyq myna ózimizdiń Maksımovke «jol búlingen, júrýge jaramaıdy, poezdy toqtat» degen belgi, — deıdi.

Bir kúni óz ýchastogin qarap júrgen Arbabaıǵa jol boıynda mal baǵyp júrgen malshy kezdesip, ol munyń jumysy jaıly, poezd týraly suraıdy.

— Poezd júrgizýshiniń bári maǵan baǵynyshty. Olar kez kelgen ýaqytta stansa bastyǵyn tyńdamaýy múmkin. Al men bar ǵoı myna qyzyl jalaýshany kóterip qalsam boldy, zýlap kele jatqan poezyń tóbege urǵandaı toqtaı qalady, — dep bósedi Arbabaı. Osy sátte ysyldap-pysyldap órge qaraı aýyr arbalaryn ázer súırep kele jatqan «qara aıǵyrdyń» qarasyny kórinedi.

— Al, qane, Arbabaı, seni tyńdaıtynyn kóreıin, mynany toqtatshy, ári poezdy jaqyn jerden kóreıik, — deıdi erigip, ermek izdep turǵan malshy jigitter.

— Kórińder, endeshe, — dep Arbabaı qyzyl jalaýshany qorjynynan julyp alyp, joldyń ortasynda tura qalady. Alqynyp kelip, Arbabaıǵa taqaı kelip toqtaǵan paravozdan qart mashınıst Maksımov ne bolǵanyn surasa, Arbabaı:

— Jol aman. Seniń berilgen belgige qalaı toqtaıtynyńdy synaıyn dep edim, — deıdi oıynda bóten eshteńesi joq jol qaraýshy. Ýaqytynan utylyp bylaı da yza bop kele jatqan mashınıst myna orynsyz synaqqa ashýlanyp, Arbabaıdy jaǵynan bir tartady da, «endigári bulaı isteýshi bolma» dep júrip ketedi.

Jańaǵy bir malshylar sodan bastap «poezd júrgizýshilerdiń Arbabaıǵa baǵynatyny ras eken. Sonyń kýási boldyq» degen áńgime taratady.

Arada biraz ýaqyt ótken soń jumysynda júrgen Arbabaıǵa taǵy bir aýyldardyń malshylary kezdesip, ony maqtaı kelip, poezdy toqtata alatynyn kórsetýdi suraıdy. Bóspeleý Arbekeń olarǵa da kóne ketedi. Kele jatqan poezǵa taǵy da jalaýshasyn kóteredi. Bul jolǵy paravoz júrgizýshi taǵy da Maksımov bolyp shyǵady. Arbabaıdyń bul jolǵy qaljyńyna qany qyza ashýlanǵan ol sol jerde Arbabaıdy uryp jyǵyp, tepkilep, joldyń úıindisine aýnatyp jiberedi.

Poezd júrip ketken soń, ústiniń shańyn qaǵyp orynynan turǵan ol, jol jıeginde at ústinde ózin kelemejdep kúlip turǵan malshylarǵa Arbabaı:

— Buryn mundaıda jaqtan bir tartyp júre berýshi edi. Myna Maksımov jyndanǵan shyǵar, endi tepkileıtindi shyǵarypty ǵoı, — dep mashınıstke narazylyǵyn bildiripti.

---