InfoHub Logo

Kereı atanyń kelini Áımı, kúıeýi ólip, jesir qalǵan soń, tórkinine otaýymen kóship baryp qonystasyp qalady. Jesirdi erden ketse de, elden ketirmeýdi qarastyrǵan jesir ıeleri bul jumysty Beısenbige tapsyrady. Sol zamanda «Qasym hannyń qasqa joly», «Esim hannyń eski joly» joly boıynsha tul áıeldiń er tańdaý quqyǵy bolady eken. Keńeske qatysqan bıler Áımıge er tańdaý quqyǵyn beredi. Bılerdi barlaı qaraǵan asqaq sulý «Kereıde meni alatyn jigit joq» dep qarysady.

Bıler keńesi Áımıge: «Sen kereı jesirisiń, kóziń túser erińe, aıaǵyń jeter jerińe toqta, kereıdiń birinen assań da, on eki kereıdiń birine toqtaısyń» dep kesim jasaıdy. Aqsha júzinde nur oınaǵan sulý Áımı: «tul áıeldiń er tańdaý quqyǵy ózinde bolsa, osy toptaǵy bıler qaýymyna quldyq uraıyn, kereı jesiri ekenim ras, kereı bıi Beısenbini tańdadym», — dep qol qýsyryp, basyn ıedi. Myna qoıylǵan orynsyz talap Bejeńe ońaı bolǵan joq. Abaqtyń bir jesirin daýǵa túsip, aqyrynda ózi alsa, qandaı ádilet bolmaq. Bul is bıler keńesiniń sarabyna salynyp, «tul áıeldiń er tańdaý quqyq zańy boıynsha, áıeldiń talap-pikiri oryndalýy tıisti», — dep sheshim jasaldy. Áımıdiń talaby oryndalmasa, «bıler zań buzdy» degen halyq narazylyǵyna qalar edi. Osydan soń bılerdiń kesim jasaýymen, jesir ıelerimen aqylǵa kelip, tıisti qalyńmal bodaýyn tólep, Bejeń Áımıdi áıel ústine alyp, jar etti.

Áımı aqyl-parasatty, el-jurtqa jaǵymdy, berekeniń adamy boldy. Áımı óziniń zerdeli, unamdy is-áreketi, aqjarqyn, meımandos, saýyqshyl ónerimen jurtqa da, Bejeńe de erekshe unady. Ol ustaǵan úı túgel túsetin, beldeýinen at ketpeıtin, Beısenbi bıdiń ardaqty shańyraǵyna aınaldy. Osyny kóre almaǵan kúndesi qyzǵanysh týdyrdy. Óziniń jaqyndaryn, yrqyna kónetin adamdaryn Áımıge qastandyq jasaýǵa aıdap saldy. Osy qatigez, qaranıet qaıshylyq jaǵdaıynda Áımı solardyń qolynan qaza tapty. Bul kezde Beısenbi taǵy bir sez-
ge ketken edi. uzaq joldan at soǵyp, sýyt kelgen Bejeń jar ólimine qatty kúızeldi. Júregi tilinip, qabyrǵasy sógildi. El-jurt, aqsaqaldar aqyl-keńes bermese, Bejeń de qusaǵa býlyǵyp, tirshilikten ýaz keshe jazdady. Osy kúıikti sher «Arman» atty kúı bolyp bizge jetti.

---