InfoHub Logo

— Júsip! — dedi asúı jaqtan anasy.

Shuǵyl bir sharýamen shaqyrǵanyn úninen bilgen Júsip júgirip bardy.

— Bazarǵa baryp kel! — dedi anasy qaltalaryn aqtaryp jatyp. — Naǵashy atańa baryp, qulyp alyp bersin deıdi deseń, alyp beredi. Óziń alyp qoıyp júrme. Naǵashy atań qandaı qulyptyń jaqsy ekenin biledi.

İshki qaltalarynyń birinen shıyrshyqtalǵan bir ýys aqsha alyp shyǵyp, Júsiptiń qolyna ustatty.

— Oınap júrip almaı, tez qaıtyp kel. Qulyp kerek bolyp jatyr! — dedi Júsip burylyp, júgire jónelýge yńǵaılana bergende.

— Maqul, — degen Júsip aıaǵy-aıaǵyna tımeı bazarǵa qaraı usha jóneldi.

Bazarǵa bar dese, qaı bala irkile alǵan? Óıtkeni onda bal tatyǵan balmuzdaq bar ǵoı. Kókeıin sol tesken Júsip te jolda bir sát aıaldamaı, sar jelgen kúıi naǵashy atasynyń dúkenine jetti. Biraz kún kórmeı, saǵynyp qalǵan atasy emirene qarsy alyp, mańdaıynan ıskegen soń, anasynyń tapsyrmasyn aıtty Júsip. Asyqpaı tyńdap bolǵan naǵashy atasy:

— Jaqsy, — dedi ornynan kóterile berip. — Men baryp alyp keleıin. Sen osynda dúkenge qaraı tur. Bireý surasa qazir keledi de.

Naǵashy atasy ketken soń ornyna jaıǵasyp alyp, jan-jaǵyna jaǵalata kóz tastaı bastady. Bazarshylar endi-endi kelip, kerek-jaraqtaryn izdep júrgen sekildi, júrginshiler qarasy az kórindi. Esesine dúkenshilerdiń bári kelip, esikterin ashyp, zattaryn syrtqa shyǵaryp tastapty. Qatar-qatar ilingen kıim-keshekten ishki jaq kórinbeıdi. Únemi kelip turatyn bolǵandyqtan, tanıtyndar alystan bas ızep amandasqan boldy.
Naǵashy atasy kóp aılanǵan joq. Mańaıdy bir sholyp shyqqansha-aq kelip qoıdy.

— Mine, — dedi qolyndaǵy qulypty qorabymen Júsiptiń alaqanyna salyp jatyp. — Qudaı sátin salǵanda, qulyp satatyn Batyrbaı ornynda eken, sharýa tez bitti.

Artynan qaltasynan artylǵan aqshany alyp shyǵyp, jıeniniń qaltasyna salyp berdi. Osy sátti kútip turǵan Júsip oryndyqtan túsip, ketýge yńǵaılana berip edi:

— Toqta. Balmuzdaq jeıtin aqshań bar ma? — dedi naǵashy atasy bógep.

— Bar, — dedi Júsip.

— Qaıda?

— Myna… artylǵan aqsha bar ǵoı, soǵan alyp jeı salmaıym ba, — dedi tyqyrshyp turǵan Júsip alaqanymen janqaltasyn syrtynan basyp.

— Joq! Bolmaıdy! — dedi osy kezde úni tosyn qataıǵan naǵashy atasy julyp alǵandaı. — Bolmaıdy. Qaıtqan aqshaǵa tıisýshi bolma!.. Má, men bereıin, soǵan alyp je! Artylǵan aqshany anańa tolyq aparatyn bol! Ony ruqsatsyz jumsaýǵa bolmaıdy! — dedi sońynan taǵy bir ret qaıtalap.

Júsip úndegen joq. Ne derin bilmedi. Tek qaltasyndaǵy aqshaǵa tıisýge bolmaıtynyn ǵana shamalady.

Naǵashy atasynyń beretin aqshasy alaqanyna túse sala, ol jedel qoshtasyp, jolyna tústi.

Kelgen soń bolǵan jaıdy anasyna aıtyp berip edi, ol jymıa basyn shaıqap, «Áı, asyl ákem! Dúnıede sizden ótken adal adam bolmas!» dedi kúbir etip. Sosyn Júsipke burylyp:

— Sen de naǵashy atań sekildi adal adam bol! Úlkender ruqsat etpegen nársege eshqashan tıispe! — dedi basynan sıpap.

Júsip sonda baryp is mánisin tereń túsingendeı boldy.

---