InfoHub Logo

Bilim jáne ǵylym mınıstri Ashat Aımaǵambetov bilim jáne ǵylym salalaryn sıfrlandyrý jumysy qalaı atqarylyp jatqany týraly málimettermen bólisti.

«Ótkende memleket muǵalimderdiń jalaqysyn ósirgende jumysta otyryp alyp, «órt sóndirýshi» bolyp kettik. Qaı jerde aqsha tólendi, qaı jerde tólenbedi – bárin baqylap otyrýǵa týra keldi. Sebebi bilim júıesiniń sıpaty óte ortalyqtandyrylǵan. Ár aýdan nemese oblysta aılyq tóleý, shákirtaqy nemese syıaqy berý jumystary másele týyndatady. Sol sebepti qysqa ýaqyttyń ishinde qarjylandyrý salasynda sıfrlandyrý jumystaryn júrgizý kerek», - dedi Ashat Aımaǵametov qashyqtan oqytý tehnologıalaryn qoldanýdyń problemalary talqylanǵan onlaın rejımdegi kezdesýde.

Mınıstrdiń aıtýynsha, Ǵylymı jumystardy tirkeýdiń qazaqstandyq ındeksinde ǵalymdardyń bazasy, ótinimderdiń tizimi, eseptilik te engizilmek.

«Máselen belgili bir ǵalym osynsha qarajat aldy desek, ol aqshany qalaı paıdalanǵanyn, eseptilik qalaı bolǵanyn tekserip otyrýǵa bolady. Kolejderde de orta bilimdegideı problemalar qordalanyp tur. Atap aıtqanda bilim berý kontentteri turǵysynda qıyndyqtar bar. Platformalar bar desek te, kontent, elektrondy jattyǵý alańy, elektrondy oqýlyq ta joq», - dedi ol.

Ashat Aımaǵambetov mınıstrliktiń qazirgi tańda mektepter boıynsha elektrondy oqýlyqtarǵa basa mańyz berilip jatqanyn jetkizdi.

«Kóp adam bylaıǵy kitapty elektrondy formatqa aýystyrdy – bitti, másele sheshildi dep oılaıtyn bolý kerek. Keı jerde solaı aýdarylyp ta jatyr. Biraq qashyqtan oqytýdyń talabyna saı keletin laıyqty elektrondy oqýlyqty daıyndap jatqan baspalar bar. Qazir atyn ataǵym kelmeıdi. Baspalardyń aldyna elektrondy oqýlyqtarymyz bolýy kerek degen talap qoıdyq. Balalarǵa ol qoljetimdi bolýy tıis», - dedi ol.

---