InfoHub Logo

Asqabaqtyń adam azǵasyna paıdasy ejelden belgili. Bul kókónisti tamaq retinde jeý arqyly aǵzany qajetti dárýmender men mıneraldy zattarǵa tolyqtyrasyz ári kóptegen dertke daýa bolatyn qasıeti bar. Ásirese, asqabaqtyń dáni óte paıdaly zattardyń qaınar kózi. Aıtalyq, asqabaq dánimen halyq eminde júrek qan tamyr aýrýlaryn emdeıtinin bilesiz be? Odan da basqa myń túrli dertke shıpa bolady. Naqtyraq aıtqanda:

1. Qandaǵy holesterın deńgeıin túsiredi

Júregi aýyratyn naýqastarǵa asqabaq dánin úzbeı jeýge keńes beremiz. Óıtkeni bul dán qandaǵy holesterındi tómendetip, trombtyń túzilýin retteıdi. Quramyndaǵy fosfor, mys, temir elementteriniń arqasynda qan azdyq pen ateroskleroz aýrýynan aıyqtyrady.

2. Klımaks kezindegi aýyrlyqty boldyrmaıdy

Etekkir úzilisi – kez kelgen áıelde aýyr ótetin jaǵdaı. Bul ýaqytta qyryq túrli dert qozyp, jalpy jaǵdaı nasharlaıdy. Gormonaldyq ózgerister oryn alady. Al osyndaı aýyrlyqty jeńil ótkergińiz kelse, onda quramy dárýmender men mıneraldy zattarǵa baı asqabaq dánin jeýdi ádetke aınaldyryńyz. Klımaks kezinde áıeldiń qyzýy kóteriledi, toqtaýsyz terleıdi, kóńil-kúıi nasharlaıdy, júrek soǵysy ózgerip, qan qysymy oınaıdy. Bul jaısyzdyqtyń birden bir emi – asqabaq dáni ekenin eskerińiz.

3. Qaterli isiktiń aldyn alady

Asqabaq dáni – kýkýrbıtın dep atalatyn teńdessiz baılyqtyń qaınar kózi. Al bul zat óz kezeginde qaterli isik aýrýynyń aldyn alyp, aǵzany saqtaıdy ári qorǵaıdy. Mamandar asqabaq dánin úzbeı jeıtinderdiń baýyr, sút bezi, tik ishek, uıqy bezi, ókpe, asqazan qaterli isik aýrýyna eshqashan shaldyqpaıtynyn rastaıdy.

4. Qandaǵy qanttyń mólsherin retteıdi

Ózderińiz biletindeı, qant dıabetine shaldyqqan naýqastar belgili bir mázirde tamaqtanýy tıis. Qantty, táttini, ashyny, maılyny shektese, al kókónis, jemis, býǵa pisken jáne qaınatylǵan taǵamdarǵa ruqsat etiledi. Oǵan qosa, asqabaq dániniń de keremetteı paıdasy bar ekeni aıtylady. Bul baǵaly dán aǵzadaǵy ýly zatty shyǵarady, jasýshalardy jańartady, uıqy beziniń jumysyn jaqsartady, ınsýlınniń durys bólinýin qadaǵalaıdy. Nátıjesinde qandaǵy qant mólsheri óz qalpyna keledi.

5. Erlerdiń densaýlyǵyn jaqsartady

Prostatıt, qýyq túbi beziniń qabynýy er azamattardyń kópshiliginde kezdesetin aýrý. Atalǵan aýrý densaýlyǵyńyzǵa ǵana emes, ómir súrý qalpyńyzǵa da, tósektegi tirligińizge de keri áserin tıgizedi. Al onyń aldyn alyp nemese saqtanǵyńyz kelse, bir ýys asqabaq dánin jeńiz. Emdi kúnine 3-4 ret qaıtalaý arqyly aıyqpas dertińizden arylasyz. Asqabaq dániniń quramyndaǵy L-argının zaty erlerdegi testosteron gormonyn jandandyryp, qýyqasty beziniń jumysyn jaqsartady. Sonymen qatar, jambastyń qan aınalymyn tezdetip, sýyqty emdeıdi ári isigin qaıtarady.

6. Artyq salmaqtan aryltady

Kez kelgen dán, ásirese asqabaq dáni ósimdik aqýyzy men jasunyqqa baı. Al bul zattar óz kezeginde aǵzadaǵy maıdy eritip, artyq salmaqtan aryltady. Dıetologtar qarnyńyzdyń ashqanyn seze bastasańyz, asqabaq dánin jeýge ádettenińiz deıdi. Onyń quramyndaǵy paıdaly zattar ishektiń jumysyn jaqsartyp, zat almasýdy retteıdi.

7. Kóńil kúıdi kóteredi

Asqabaq dánin jeseńiz aǵzada serotonın atty qýanysh gormony bólinedi. Dánniń quramyndaǵy trıptofan amınqyshqyly sizge sergektik syılaıdy. Júıkeni jaqsartyp, mıdy tynyqtyrady. Dıetolog mamandar kúnine jeti dana asqabaq dánin jeseńiz, kóńil-kúıińizdi keremet kóteredi deıdi. Sondyqtan da depressıa alǵan adamǵa, streste júretinderge jáne únemi mazasyzdanatyndarǵa asqabaq dánin qaltańyzdan tastamańyz dep keńes beremiz.

8. İshekti qurttan tazalaıdy

Asqabaq dániniń quramyndaǵy kýkýrbıtın amınqyshqyly – ishek qurttarynyń naǵyz jaýy. Aǵzadaǵy kez kelgen qurttan asqabaq dánin jeý arqyly ońaı qutylasyz. Dánniń densaýlyqqa tıgizetin zıany joq.

9. Býyn aýrýynan qorǵaıdy

Sýyqqa qarsy kúresetin kúshke ıe asqabaq dáni býyn aýrýyn emdep, tuz baılanýdy boldyrmaıdy. Sondaı-aq, nesep júrgizip, artyq tuzdy shyǵarady. Keremet emdik qasıtke ıe dán býyndy túrli dertten saqtaıdy.

10. Osteoporoz aýrýynyń aldyn alady

Quramy kálsı, magnıı jáne myrysh elementine baı asqabaq dáni súıektiń saýlyǵyn jaqsartady. Sondyqtan da osteoporoz aýrýynyń aldyn alǵyńyz kelse, qartaıǵanda súıekten aıyrylǵyńyz kelmese nemese súıektiń synýynan saqtanǵyńyz kelse, onda kúndelikti tamaqtyń aldynda asqabaq dánin jeýdi umytpańyz.

L. Ahmetova

---